Shillong, Risaw 11
Kawei ka longkmie ka la pyntip ba ka la shah shoh shah dat ha ki katto katne ngut ki briew kiba la don hapdeng ka jingshoh khawiang kaba la jia ha ka Lad Nongshken bad Thymmai ha ka janmiet jong ka Sngi U Blei.
Katkum ka jingïathuh kane ka longkmie, katei ka jingjia ka la jia ha ka por kumba 5 baje eiei jong ka janmiet Sngi U Blei ha kaba 5 ngut ki briew kiba shong dih kyiad ki la kren da ki ‘tien sieh ‘tien sang ki bym sngewthuh sngewthaw.
Haba kren sha ki lad pathai khubor, katei ka longkmie kaba la kynnoh shah shoh shah dat ka la ïathuh ba ha ka janmiet jong ka sngi u Blei katba ka dang wan na ka shnong Tangriang bad haba poi ha katei ka jaka, ka la ong ba ka jingshah thombor ka la jia tang namar ba ka buh jingkylli ïa ka jingïakren sih kren sang bad la ki paralok ha lynti ban leit sha Raid Nongshken.
Kane ka longkmie ka la ïathuh ba kine ki briew kiba dang ïa shong dih kyiad bad kren da ka sih ka sang bad haba ka kylli balei ba ki tim sih, ki la ong pynban ba ki khlem tim sih bad mar kumta ki la sdang ban shoh la dat ïa ki.
Shuh shuh kane ka longkmie ka la ïathuh ba hadien kane ka jingjia ki la leit ban ujor da ka ejahar pyrshah ïa kine san ngut ki briew.
Katkum ka jingïathuh kane ka longkmie bad ka dur-khih (video) ba la ring, kine ki briew ki la shoh ruh ïa uwei u rangbah hadien ba ki la sei ïa u na kali bad ym tang ba ki la shoh hynrei ka la ong ruh ba kine ki briew ki la thmu wat ban shim ïa ka jingim da kaba thmu ban tied ïa une u rangbah da ki nar ba sei na kali bad da ki bilor kyiad.
Ka la pyntip ruh ba ka la ujor ïa kane ka jingjia sha thanat bad ki pulit ki la kem ïa kine ki briew hynrei la ïoh jingtip ba ki la lait noh na along hynnin ka sngi.
Kane ka longkmie ka la kynnoh ruh ba ki pulit ki la bthah ïa ka ban ïasuk noh namar kine ki briew ki dei na kajuh ka shnong.
“Nga la ong ïa ki ba ngam lah ban ïasuk tang namar ba ngi dei para shnong namar kine ki briew ki la thmu shisha ban shim ïa ka jingim briew ha kato ka sngi namar ki la shoh bad tied khlem da don mynsiem synei shuh,” la ong katei ka longkmie.
