Jowai, Risaw 12
Ka ïingbishar Special Judge (POCSO) West Jaiñtia Hills Distrik, Jowai ka la rai pynrem da kaba set patok lai snem kynthih ha ryngkat ka kuna kaba long T.5000 pyrshah ïa uwei briew ba la tip kyrteng kum u Lucky Dhar namar ka jingdonkti ha kaba thmu leh be-ijot ïa ka khynnah 10 snem rta ha ka 03.03.2019.
Ka ïingbishar Special Judge (POCSO) ka la rai pynrem ïa une briew ha ka 29 tarik Nailur 2023.
U Superintendent of Police ka West Jaiñtia Hills, Jowai lyngba une u kyrwoh u la ong ba ha ka 03.04.2019 kawei ka longkmie ka la wan ujor da ka ejahar ha u Officer In-Charge, Amlarem Police Station da kaba pynpaw ba utei u briew (Lucky Dhar) u la pyrshang ban leh be-ijot ïa ka khun jong ka, kaba dang 10 snem rta hapoh ka ïingsah jong ki. La ïathuh ba une u Lucky u la jrong-kti ïa kane ka khynnah ha ka por ba ka dang thiah bad hadien ba kane ka khynnah ka la kyndit naba ïohthiah bad sdang ban ïam.
Hadien ba la ïoh jingtip halor kane ka jingjia, ka nongujor ka la leit sha u rangbah shnong uba la ai jingmut ïa ka ban leit ujor sha ki bor pulit. Kumta ki pulit ki la pynrung case hapoh thanat Amlarem lyngba ka Amlarem PS Case No. 11(4)2019 hapoh ki kyndon 7/8/18 of Protection of Children from Sexual Offence Act (POCSO), 2012 pyrshah ïa une u briew uba shah kynnoh donkti.
Na ka liang ka Sub-Inspector Kong I Nongrum ka la shimti ïa ka jingtohkit halor kane ka jingjia bad hadien kata la aiti sha ka Inspector Kong P.E Marweiñ ban pyndep ïa ka jingtohkit.
Hadien ba la pyndep ïa ka jingtohkit ka Inspector P.E Marweiñ ka la charge-sheet pyrshah ïa une u briew uba la shah kynnoh donkti hapoh ki kyndon jong ka POCSO Act namar ka kam leh bor pyrshah ïa ka khynnah rit.
Kumta hadien ki sakhi satar kiba biang bad hadien ba la dep ban tiañ bishar, ka Kashari Special Judge (POCSO), West Jaiñtia Hills Distrik, Jowai, ha ka 29.09.2023 ha ka Special Session (POCSO) ka la lap ïa ka jingdonkti jong u Lucky Dhar halor kane ka kam lehbor pyrshah ïa kane ka khynnah bad pynbna ïa katei ka rai pynrem.
