Shillong, Risaw 12
Ki nonghikai ka skulbah NEHU kiba don hapoh ka synjuk jong ka North Eastern Hill University Teachers’ Association (NEHUTA) ki la byrngem ban dawa hiar shuki noh ïa u Prof Prabha Shankar Shukla na ka kam Vice Chancellor lada um lah ban khot kloi noh ïa ka jingïalang ba kyrkieh jong ka Academic Council (AC).
“Ngin nym buh por shuh nangne shakhmat ba u VC un leh eiei, hynrei ha kaba ngin sa shim hi ïa ka rai ha ka jingïakhih ka ban wan, ka ban long hapoh ka shi taïew ne ha ki 10 sngi ban wan,” la ong u President ka NEHUTA u Prof Lakhon Kma haba ai jingkren ha ka jingïalang ha ka por ba la pynlong ïa ka jingïakhih da kaba ïaid paidbah ba la pynlong ha kane ka skulbah ha ka sngi Palei.
Ha kajuh ka por u la ong ruh ba kin sa shim ïa ka rai ryngkat ka jingïatreilang bad ka Meghalaya College Teachers Association (MCTA) bad ka NEHUNSA ïa ka lynti ban shim shakhmat.
Ha ka sngi Palei, ki nonghikai ka skulbah NEHU kiba don hapoh ka synjuk jong ka NEHUTA ki la pynlong ïa ka jingïakhih da kaba ïaid paidbah na Central Library shaduh ka shlem treikam u Vice Chancellor (VC) ka NEHU u Prof PS Shukla.
Kane ka jingïakhih ki nonghikai NEHU ka dei ban dawa na u VC ba un khot ïa ka jingïalang ba kyrkieh jong ka Academic Council, ka ban ïathir sani halor ka jinglong jingman ka skulbah NEHU bad ka jingpyntreikam ïa ka National Education Policy (NEP) 2020.
Katkum ka jingpynpaw u Prof Lakhon Kma la ong ba kum ki nonghikai kin nym don ka jingartatien ban dawa ïa ka jinghiar shuki (resignation) jong u VC lada um lah ban ïaid shakhmat na ka nongrim ka jong u bad bteng ban ïai sngap kuman.
U President ka NEHUTA u la ong ba u VC u dei bad donkam ban pynbeit naba uwei u briew un nym lah ban rai halor ka kam ba ïadei bad ka pule puthi tang da kaba shong na ka kamra treikam.
“Ka NEP ka dei ka kpait-saiñ-kam (policy) ba ai jinghikai ba kyrpang. Ka academic council ka long halor ban rai halor ka NEP. Ki kyndon ki la kren shai ba u VC um don lad da kumwei hynrei ban khot ïa ka jingïalang ba kyrpang bad ba kyrkieh jong ka Academic Council, lada lai paw na ki dkhot ki la dawa ïa ka. Ngi la don haduh 100 ngut kiba la soi kiba la kwah ban khot pynlong ïa ka jingïalang ka AC,” u la ong.
U la ong ba u VC um lah ban shim ïa kane ka skulbah kum ka jaka shimet ka jong u bad ban treikam kum u CEO.
U la ong ruh ba ki la hap ban shim ïa kane ka lynti kaba kham eh ka long naba na ka liang u VC haduh mynta um pat ai jubab ïa kane ka jingdawa ba shong nongrim kaba ki la bud ban dawa na u ban pynbeit ïa ka rai jong u ban pyntreikam ïa ka NEP khlem ka jingmynjur jong ka AC.
“Ka AC ka la rai ba ïa ka NEP dei ban pyntreikam naduh u snem 2024-2025. Hynrei kane ka rai kam shym la paw satia ha ki jingïakren. Ha ka jingshisha tang san ngut ki dkhot jong ka AC kiba la rah ïa ki kti ban kyrshan ïa ka jingthmu pyntreikam ïa ka NEP naduh kane ka snem,” la ong u President ka NEHUTA.
U Prof Kma u la ong ba ki dkhot ka AC ki la shah shet, hadien ba na ka liang jong u VC u la ïaid shakhmat ban pynbna hakhmat ki lad pathai khubor ba kane ka skulbah ka la rai ban pyntreikam ïa ka NEP naduh mynta u snem.
Katkum ka jingpynpaw ka jong u, u VC u la ïalehkai bad ka lawei jong ki samla pule da kaba ailad ïa kane ka mat ban tan shakhmat.
Ha kane ka rally la wan ban ïashimbynta lang da ki dkhot ka Meghalaya College Teachers Association (MCTA), NEHUSU bad ka KSU NEHU Unit nalor ki samla pule bad ki nongtrei ka skulbah NEHU.
