Shillong, Risaw 12
Ka Kong Bariphylla Nongsteng kaba dei kawei na ki nongtrei Anganwadi na Umthli A, Laitlyngkot ha East Khasi Hills, ka la shah pynkup burom da ka khusnam ryngkat ka jingthoh ba pyrto na ka Myntri ba khmih ïa ka Ministry of Women & Child Development ka Smriti Irani.
Ka jingïoh pdiang jong ka Kong Bariphylla ïa katei ka khusnam ka la long ha ka 10 tarik mynta u bnai halor ka jingtrei shitom jong ka ban ïakhun ïa ka jingpang Severe Acute Malnourished (SAM) ki khunlung hapoh ka shnong Umthli.
Ha kaba ïadei bad ka jingïoh khusnam jong kane ka nongtrei Anganwadi, la pyntip da u Myntri ka tnat Social Welfare ka Jylla Bah Paul Lyngdoh haba kren sha ki lad pathai khubor ha ka sngi Palei, ha kaba u la ïathuh ba ka Kong Bariphylla ka dei kaba la trei kum ka nongtrei Anganwadi mynta la 7 snem hapoh ka Umthli A Anganwadi Centre.
Ha ka jingleit jngoh ïa ki longkmie ba ïoh khun rit, ka Kong Bariphylla ka la shem ba iwei i khun kynthei (1 snem 1 bnai) ba kha synrap jong ka Kong B Nongsteng i la don ha ka jingbym khlaiñ na ka jingduna ka bam tei met (SAM) bad khia tang 5 kilo jrong tang 63 cm kat haduh u Lber 2023 katba i khun synrap shynrang pat i don hapdeng ka met ba shait ba khlaiñ.
Hadien kane ka jingshem, ki Medical Officer, CDPO, LS, ANM, Anganwadi bad ASHA ki la leit jngoh bunsien ïa ine i khunlung naduh u Lber 2023 bad ai jingïasyllok ruh ban kit noh ïa i sha NRC ha Shillong. Ki kmie kpa haba nyngkong ki la pyneh ban leit wad jingsumar bad ban pynthiah ïa ine i khunlung ha NRC da kaba kam ba i khunlung i dei ba shait ba khlaiñ.
Da ka jingïatreilang kynthup u MLA, ka DC, MCH Officer, DPO, CDPS bad POSHAN Consultant lem bad u Rangbah Shnong ban leit ïakren, kumta ka kmie bad u kpa haba khatduh ki la rah ïa i khun ban ai jingsumar ha NRC naduh ka 17 tarik Ïaïong haduh ka 4 tarik Jymmang, 2023.
Ïa ine i khunlung la sumar kum i SAM, jingtlot bormet bad jingduna ka jingsan. Hadien kane, ka Kong Bariphylla ka la leit ban buddien ïa ine i khunlung bad ha ryngkat u Rangbah Shnong, ki ju pynkynmaw ïa u kpa ban sumar bha bad leit phah peit ïa ine i khunlung na ka por sha ka por.
Ine i khunlung i la nang khlaiñ mynta bad ka jingkhia jong i kat haduh u Nailur 2023 ka la kot sha ka 6.9 kilo bad ka jingjrong ka long72 cm. Ine i khunlung mynta i la lah ban shong hi dalade khlem kano-kano ka jingïarap bad sdang ruh ban par.
