Shillong, Risaw 12
Ki kynhun niam bapher bapher hapoh ka shatri jong ka Shillong All Faiths Forum (SAFF) ka la ïasnoh kti lang bad ka Sorkar Jylla na ka bynta ban ïakhun pyrshah ïa u drok uba la pynjot ïa ka imlang sahlang khamtam eh ïa ki samla bad ki longïing longsem.
Ki nongkitkam ka SAFF ki la ïakynduh ïa u Myntri ka tnat Social Welfare, Bah Paul Lyngdoh ha ka Sngi Palei bad ki la ai ka jingkular ban kyrshan lang ïa ka Sorkar Jylla kumno ban tehlakam bad pynduhjait ïa u drok.
Kane ka jingïakynduh jong ki ka dei kaba la bteng na ka jingïalang kaba la long 2 bnai mynshwa.
U Bah Paul u la ai khublei ïa ki nongïalam niam kiba la wan lang hapoh kawei ka kynhun ban kyrshan ïa ka Sorkar ha kaba la pynkhreh ruh ban pynlong bun tylli ki jingpynshai bad sngewthuh nalor ka jingpynlong ïa ka seminar ha ka 5 tarik Nohprah, 2023.
Uwei na ki dkhot ka SAFF, u Naba Bhattacharjee u la ïathuh ba ka SAFF ka kwah ban ïadonbynta lang bad ka Sorkar ban ïaleh pyrshah ïa ka jingjyllei jong u drok ha ka jylla.
Na ka liang u Bah Paul Lyngdoh u la ong ba ka jingdonbynta ki nongïalam niam ka long kaba donkam haduh katta katta namar ka Sorkar kan nym lah ban ïakhun tang marwei ïa kane ka jingeh kaba la long ka jingsniew, hynrei ka donkam ïa ka jingïatreilang jong baroh.
U Bah Paul u la ïathuh ba ka tnat Social Welfare kan ïatreilang ryngkat bad ka SAFF namar da ka jingïatrei lang ki nongïalam niam kin lah ban kren halor ka jingma jong u drok bad kin lah ruh ban pynshai sha ki paidbah na ki jaka mane la ka dei ki ïingmane, mandir, mosque, bad ban ai jinghikai ïa ki samla ba kin lait na une u jingdih uba sniew.
U Bah Paul u la ong ruh ba ka Sorkar lyngba ka jingkyrshan jong ka Sorkar Pdeng kin sa shna sa 10 tylli ki rehabilitation centre kynthup ha ka jylla, ha kaba ïa kine yn pynïaid da ki kynhun, ki seng trei mon sngewbha bad kiwei kiwei.
U la ong ba tang ka jingïatreilang kaba lah ban pynjop ha ka jingïakhun bad ka Sorkar hi kam lah ban trei tang marwei.
