Shillong, Risaw 12
U Myntri ka tnat jngohkai ka Jylla, Bah Paul Lyngdoh u la ïathuh ba ka Jylla kan ïoh ban pynlong ïa ka International Tourism Mart (ITM) ha nongbah Shillong naduh ka 21 tarik haduh 23 tarik u Naiwieng.
U la ïathuh ba ha kine ki lai sngi lynter ka Jylla kan sa pyninam ïa ki jingshna, ki jingthaiñ bad kiwei kiwei kiba pynmih na ka jylla lyngba ki tour operators, bad ki trai jong ki home stay.
U la ong ruh ba ka ITM 2023 kan dei ka jingmyntoi ïa ka jylla namar kane kan dei ka sien ba nyngkong ba ka jylla ka ïoh ban pynlong ïa kum kane bad ka thong kaba hakhmat duh ka dei ban kyntiew ïa ka kam jngohkai pyrthei ha ka jylla.
U la ong ba kin don ruh ki nongjngohkai pyrthei na kiwei pat ki ri ka pyrthei bad na kylleng ki jylla jong ka ri ki ban wan sakhi bad ïashimbynta.
U la ong ba lyngba kane, ki kwah ban pynpaw pyrthei ïa kaei kaba ka jylla Meghalaya ka don kum ka jaka jngohkai Pyrthei.
La khmih lynti ba u Myntri ka tnat jngohkai ka Sorkar Pdeng u GK Reddy un sa wan ban plie ïa kane ka ïew.
