Gaza, Risaw 12 (UNI)
Kumba 3.40 lak ngut ki nong Palestine ki la kylla phet wir naduh ba sdang ka thma hapdeng ka Hamas bad Israel, la pyntip ka United Nations Relief and Works Agency for Palestine Refugees (UNRWA).
Ha u kyrwoh khubor ba la phah sha ka Xinhua, ka UNRWA ka la ong ba 2,18,600 ngut ki nong Palestine mynta ki shong ki sah ha ki 92 tylli ki ïing skul kiba don ha ki bynta bapher-bapher jong ka Gaza Strip. Kine ki ïing skul ki dei kiba ïatreilang bad ka UNRWA.
Nalor kitei, ka UNRWA ka la ong sa kiwei pat ki nong Palestine ki la shong la sah ha ki skul sorkar bad kiwei pat ki ïing. Ka la ïathuh ba ka jingdon jong ki briew kiba kylla phet wir ka la nang kiew man la ka sngi.
Ha kajuh ka por, ka UNRWA ka la ong ba ki jaka sah ki la nang khapngiah bad ka la don pat ka jingduna ha ki mar bam bad ka umbam umdih.
“Ka jingkyrduh um ka la nang jur ha ki jaka sah ka UNRWA bad ha baroh kawei ka Gaza namar ka jingduna ka bording ban tan ïa ka um bad ban pynkhuid ïa ki shlem ba pynlang um,” la ong ka UNRWA.
Ha kawei pat ka lang, ka jingïap briew ha Israel naduh ka Sngi Saitjaiñ bad haduh mynta ka la kot sha ka 1,300 ngut katba kiba mynsaw ki don haduh 3,418 ngut.
Ha Gaza, kiba la ïap haduh mynta ki long 1,417 ngut katba 6,268 ngut ki la mynsaw, bad nalor kine, ki don sa kumba 1,500 ngut ki lehnoh Hamas kiba la shah pynïap ha Israel.
Ha West Bank, kiba la ïap ki don 31 ngut bad 600 ngut ki la mynsaw katba ha Lebanon, san ngut ki la ïap.
Ka Israel ka la hiar thma ïa ka Gaza hadien ba ka Hamas ka la thombor ïa ka Israel na ki bynta ba Shathie ha ka Sngi Saitjaiñ.
