Jowai/Khliehriat, Risaw 12
Ka Mock drill halor ka jingkhynñiuh jumai bad twa khyndew ba la pynlong da ka Distrik Disaster Management Authority (DDMA), West Jaiñtia Hills bad East Jaiñtia Hills Distrik la pynlong ha ka sngi Palei ha ki ar distrik.
Ha West Jaiñtia ïa kane ka Mock Drill ne ka jingpyni nuksa kumno ban ïada lada wan ka jingkhynñiuh jumai bad twa khyndew la sdang ha ka por 9.00 baje da ka jingpah siren bad ki nongïarap ki la leit ban ai jingïarap ha Iaphi shopping complex, Bharat Petrol pump, Gate Laban, Presbyterian School bad Mission Compound, Jowai.
Ha kane ka jingkhynñiuh jumai bad twa khyndew la leh mynleh kumba la shah ban ha ki maw ki dieng, ki don ruh ki briew kiba la sahkut hapoh ki ïing ki sem bad ki nongïarap ki la leit ban ai jingïarap ïa ki bad kit sha ki jaka sumar ne relief camp kaba la buh ha Dorbar Shnong Lion Mission, Jowai na ka bynta kito kiba donkam jingïarap.
Ha kane ka sngi la wan ïashim bynta da kiba bun ki naduh ki Doctor, ki Nurse, ki heh ka distrik, ki pulit, ki SDRF, Fire and Emergency Services, ki longkmie lomhkpa, ki khynnah skul bad kiwei kiwei.
Katba ha East Jaiñtia Hills Distrik pat ïa kane ka Mock Drill la pynlong ophis u Block Development Officer Khliehriat, ha Khliehriat Presbyterian Secondary School, ha Civil Hospital, Khliehriat, ha 1 India Family Mart, Khliehriat, ha Seiñ Raij L.P School, Moolyngkut bad ha Meghalaya Cements Ltd, Thangskai katba ïa ka Staging Area la pynïeng ha madan Khliehriat Higher Secondary School, Khliehriat.
La shim bynta da ki pulit, ki Fire & Emergency Services, Civil Defence & Home Guards, ki doctor ki nongtrei ha ki Hospital, ki nongshong shnong, ki Volunteer, ki NSS Unit na Jaiñtia Eastern College, Khliehriat bad na Don Bosco College, Byndihati.
