Shillong, Risaw 12
Ki shipai suiñ ka Israel ha ka Sngi Palei ki la pyntip ba naduh ka Sngi Saitjaiñ bad haduh kane ka khyllipmat, ki la dep ban kawang bad pynhap haduh 6,000 tylli ki bom ha ki ktem jong ka kynhun pyntriem Hamas kiba don ha Gaza Strip.
Haba pynbna ïa kane lyngba ka rynsan X mynta ka sngi, ki shipai suiñ ki la ong ba da ki phew tylli ki Jet bad Helicopter ki la thombor ïa bun bah ki ktem jong ka Hamas ha ki bynta bapher bapher jong ka Gaza Strip.
La ïathuh ruh ba uwei u Commander ka Hamas bad shi kynhun ki dkhot kane ka seng kiba la donkti ban leh ïa ki kam pyntriem pyrshah ïa ka Israel ki la shah pynïap.
Shuh shuh la ong ba ha kane ka jingpynhap ïa ki bom, da ki spah ngut ki lehnoh ki la ïap. Ka la don ruh ka jingthombor ïa palat 3,600 tylli ki ktem ba kynthup ïa ki Command bad Control Centre, shlem jong ki lehnoh, karkhana shna tiar siat, shlem jong ki tnat syntiat, shlem ba sah ki nongïalam ka Hamas bad kiwei.
Ki shipai suiñ ka Israel ki la pynbna ba kin bteng ban thombor katba dang donkam.
