New Delhi, Risaw 12
Ka shlem treikam u Myntri Rangbahduh ka Israel ha ka Sngi Palei ka la pyllait paidbah ïa ki dur jong ki katto katne ki khyllung kiba la shah pynïap bad shah thang dusmon ha ki lehnoh Hamas.
Ha rynsan X, ka shlem treikam u Myntri Rangbahduh ka Israel ka la thoh ba la pyni ïa ki katto katne tylli ki dur jong ki khyllung kiba la shah pynïap dusmon. La ong ba ïa kine ki dur la pyni da u Myntri Rangbahduh ka Israel, u Benjamin Netanyahu, sha u Secretary of State ka Ri America, u Antony Blinken ha ka jingïakynduh ka jong ki ha Israel mynta ka sngi.
Ha rynsan X, la thoh, “Kine ki dei ki dur ki dar jong ki khyllung kiba la shah pynïap bad shah thang ha ki lehnoh Hamas. Ka Hamas kam don mynsiem briew. Ka Hamas ka dei ka ISIS.”
Ka jingpyllait ïa kitei ki dur ki dar kiba ishyrkhei ban peit ka long hadien ba la mih ka jingshah kynthoh pyrshah ïa ka Israel kaba la kam ba ki lehnoh Hamas ki la khrai khlieh ïa ki khyllung.
Ki la don ki lad pathai khubor ha kylleng ka pyrthei kiba la pynmih ïa kata ka khubor halor ka jinglap ïa ki khyllung kiba la shah khrai khlieh ha ki lehnoh Hamas.
Wat u President ka Ri America, u Joseph Biden, ha ka Sngi Balang u la kam ba u la ïohi ïa ki dur ki dar jong kita ki khyllung kiba la dep ban shah khrai khlieh. Hynrei kham hadien, ka White House ka la pynshai ba u President lane ki heh jong ka sorkar America ki khlem pat ïohi satia ïa kita ki dur jong ki khyllung kiba la dep shah khrai khlieh.
Ki don ki lad pathai khubor kiba la pyntip ba ka Hamas ka la kyntait ïa ka jingkynnoh halor ka jingkhrai khlieh ïa ki khyllung bad ka la ong ba kine ki dei tang ki khubor lamler ba la pynsaphriang pyrshah ïa ki nong Palestine bad ïa ka jingïakhun ka jong ki.
