Jowai, Risaw:
Kum shi bynta ban ïarap ïa ki barikor (artisan) ban nang pynheh shuh shuh ïa ka kam thaiñ, ka Dakti Kraft, Shillong da ka jingkyrshan ka Meghalaya State Skill Development Society kaba hap hapoh ka tnat Labour ka Sorkar jylla, ha ka sngi Balang ka la sam da ki tiar shna sha ki 15 ngut ki nongthaiñ kiba la pyndep ïa ka jinghikai naduh ka 20.05.2023 haduh 25-05-2023 ha Common Facility Centre ka Women’s Group & Handicraft Multipurpose Cooperative Society Ltd, Madankynsaw-Mowkyndeng.
Ka Dakti Kraft Shillong ka dei ka seng kaba pynmih ïa ki tiar shna kti bad ki tiar kiba ka pynmih ki dei kiba la shna da u shken ki siej, khyndew, rimet bad ki jait ksai khlem da pyndonkam plastik.
Shwa ban sam ïa ki tiar jingïarap, ka la don ka jingïalang ha CFC, Madankynsaw-Mowkyndeng ha ka jingdonlang ka kongsan ka Kong S.E Kharpran, Functional Manager, u Namphrang Diengdoh, Training Manager, Dakti Kraft, Shillong, u Peter Sutnga, Asst Waheh shnong, ka Isabella Pakma, Secretary Women’s Group & HMPCS Ltd, u Lambormi Suchen, Skill Development Officer, West Jaiñtia Hills bad kiwei kiwei.
Ka kongsan ka Kong SE Kharpran ha ka jingkren ka la kyntu ïa ki nongthaiñ ban leh bha shuh shuh bad trei shitom kumjuh ban pyndonkam hok ïa kane ka lad jingïarap ban ïoh na ka liang ka sorkar bad ka la pynkynmaw ba ka jingïatylli ka long kaba donkam khnang ban jop ïa kino kino ki jingeh.
U Bah Lambormi Suchen ha ka jingkren u la ïaroh ïa ki tiar kiba la pynmih na ka Shnong Madankynsaw-Mowkyndeng ki dei kiba bha bad ki paw ha kylleng ka ri bad u la pynkynmaw ïa ki nongthaiñ ba ki tiar kiba ki pynmih ki poi wat shaduh sha Delhi da ka jingkyrshan lang ki tnat sorkar kum ha ka ban pynïaid ïew nalorkata u la kitbok kitrwiang ïa ki ban bha ban miat ka trei ka ktah ka kamai kajih ka jong ki.
