Shillong, Risaw 12
Ki nongïalam ka Hynñiewtrep Achik National Movement (HANM) ki la shim ïa ka rai rangbah kata ban leit ïakhih sha nongbah Delhi ban dawa na ka Sorkar Pdeng ban pyntreikam noh ïa ka Inner Line Permit (ILP), ban pynrung ïa ka ktien Khasi bad Garo ha ka khyrnit kaba phra bad ruh ban peit lem ha kaba ïadei bad ka jingpynbeit pud hapdeng ka Assam bad ka Meghalaya.
Haba ïakren bad ki lad pathai khubor, u President ka seng Bah Lamphrang Kharbani, u la ong ba na ka por sha ka por ki ju ïakhih ha nongbah Shillong hynrei mynta ka kynti kin leit ban ïakhih noh ha phyllaw ïing jong ki Myntri ka Sorkar Pdeng ba kin tip ïa kaei kaba kum ka jaitbynriew ka dawa bad ban pynkloi ban pynurlong ïa ki.
U Bah Lamphrang u la ïathuh ruh ba ka seng ha kine ki sngi ba la dep ka la leit ban ïakynduh ïa u MP ka seng BJP u Rakesh Sinha ban ïakren ïa shibun tylli ki mat ki jura kiba ktah ïa ka jylla Meghalaya bad jaitbynriew baroh kawei.
U Bah Kharbani u la ïathuh ba ka seng ha katei ka jingïakynduh ka la kyntu ïa utei u MP ban ïakren bad u Myntri Rangbahduh ka Ri, u Narendra Modi bad u Myntri ka tnad ki kam pohïing ka Ri, u Amit Shah ba kin burom ïa ka rai jong ka ïingdorbar thawaiñ ka jylla ha kaba baroh 60 ngut MLA ki la mynjur ïa ka rai ha ka 27 tarik u Nailur, 2018 ban pynrung ïa ka ktien Khasi bad Garo ha ka khyrnit kaba phra jong ka riti synshar ka Ri.
Shuh shuh u Bah Kharbani u la ong ba ka seng ka la ïakren ruh ha kaba ïadei bad ka rai jong ka ïingdorbar thawaiñ ka jylla ban pyntreikam ïa ka Bengal Eastern Frontier Regulation Act, 1873 lane ka Inner Line Permit (ILP) namar ba kum ka jaitbynriew bad kum ki riewlum, ka long kaba donkam bha ban don ïa kane ka aiñ ka ban ïada na ka jingwanrung kyrthlep jong ki briew nabar ri.
Nalor kane, u Bah Kharbani u la ong ruh ba ka mat kaba kham kongsan ba kum ka seng ka la ïakren ka long halor ka jingïapynbeit ïa u pud u sam hapdeng ka jylla Meghalaya bad ka jylla Assam kaba dang ïaid shakhmat mynta.
“Ha kane ka jingïakren, ka seng ka kren shai ba donkam ïa ka jingïarap lem jong ka Sorkar Pdeng napoh Delhi ban pynsuk ïa ka jingïakren pynbeit pud namar kumba ka long mynta ngi ïohi ki don ki jaka ba ka Sorkar Assam ka kam ba ki dei jong ki bad ki don ruh ki jaka ba ka sorkar Meghalaya ka ong ba ki hap hapoh jong ngi”, la ong u Bah Kharbani.
Na ka liang jong u MP u la ong ba un sa ïakren ïa kitei ki mat jingdawa ba la rah da ka seng bad u Myntri Rangbahduh ka ri, u Narendra Modi bad u Myntri ki kam pohïing ka Ri, u Amit Shah
Ka seng ka la leit ruh ban aiti ïa ka dorkhas sha ka shlem treikam jong ka President ka Ri, ka Droupadi Murmu, ka shlem treikam jong u Myntri Rangbahduh ka Ri, u Narendra Modi, ka shlem treikam u Amit Shah bad sha ka shlem treikam jong arngut ki Myntri ka Shatei Lam Mihngi ka ri, kata u Kiren Rijiju bad u Sarbananda Sonowal.
U Bah Kharbani u la ong ba kaba la pynlong ïa ka seng ban leit shaduh sha ka phyllaw ïing jong u Myntri Rangbahduh ka Ri bad u Myntri ki tnad kam pohïing ka ri khnang ba kan pynlong ïa ki ba kin shim khia.
“Namar ba ha kine ki snem ba la dep ïa kata ngim lah ban leh, ngi shu ïakhih hangne ha ïing lajong bad ka la dei ka por ba ngin leit ïakhih ha ïing jong ki khnang ba kin sngewthuh”, la kubur u Bah Kharbani.
U Bah Kharbani u la ïathuh ba ka seng ka la rai ban pynlong ïa ka jingïakhih ha Jantar Mantar ha nongbah Delhi ha ka 3 tarik u Naiwieng, 2023.
Na ka liang u Secretary ka HANM, Bah Kyllang S Thongni u la khot sngewbha ïa baroh ki paidbah na ka jylla, ki samla, ki longkmie ki longkpa, ki kynhun seng saiñ pyrthei bad khamtam eh ïa ki Khasi, Garo kiba shong ba sah ha New Delhi ba kin wan ban ïasnoh kti lang ha katei ka jingshong kyllaiñ mungor jong ka seng.
