Shillong, Risaw 12
Ki artylli ki Dorbar Shnong kiba kynthup ïa ka Dorbar Shnong Nongshken bad ka Dorbar Shnong Maw-dang kiba hapoh ka Raid Nongshken ki la pynshai halor ka jingïaid lait jong kawei ka longkmie ïa kaba la tip kyrteng kum ka King Sahitina Ïawip na ka shnong Mawdang ïa ki bor shnong hashwa ban leit sha ki pulit halor ka jingjia kynnoh jrong kti jong ki briew kiba la shoh khawiang ha ka janmiet jong ka 8 tarik Risaw.
Haba kren sha ki lad pathai khubor ha ka Sngi Palei ha Shillong Press Club, u Bah Thombor Marbaniang, uba dei u Rangbah Shnong ka Nongshken, u la pynpaw ba katei ka jingjia kaba la jia ha ka 8 tarik Risaw halor ka jingkynnoh shah jrong kti kawei ka longkmie kam dei kaba la jia ha u pud u sam jong ka shnong Nongshken, hynrei ka dei kaba la jia kham pajih na ka shnong.
U Bah Marbaniang u la pynpaw ruh ka jingsngewsih ïa ka jingleh jong katei ka longkmie kaba la kynnoh shai ba ki bor shnong ki khlem leh eiei satia halor katei ka jingjia.
Na ka liang u Bah D Dura, uba dei u Rangbah Shnong ka Mawdang, kaba dei ruh ka shnong kaba la jia katei ka jingkynnoh ïashoh ïadat bad jrong kti ka longkmie, u la pynpaw ïa ka jingsngewdiaw bad ka jingpynrem ïa katei ka jingleh jong katei ka longkmie kaba la ïaid lait na ka shnong khlem da pyntip sha ka shnong halor katei ka jingjia hynrei ka la leit pynban sha ki pulit.
U Bah Dura u la ong ba lada jia kiei kiei ki jingjia hapoh ka shnong, ka long kaba donkam ban wan mih shwa sha u Rangbah Shnong khnang ban ïoh ïakren bad peit ïa ka jingjia bad ba ka shongsuk shongsaiñ hapoh ka shnong ka thaw kan don.
“Katkum ki kyndon bad ki aiñ jong ka shnong, ngi la buh ba lada don uno-uno uba pynkulmar hapoh shnong, ka hap shwa ha nga u Rangbah Shnong bad hadien kata lada nga kum u Rangbah Shnong ngam lah ban pynbeit, ka la hap ha u Sordar jong ka Raid,” la ong u Bah Dura.
Na ka liang kitei arngut ki Rangbah Shnong ki la ïathuh ruh ba ki la ïoh jingtip halor katei ka jingjia na ki pulit kiba la ‘phone’ sha ki bad pyntip ba ka don kata ka jingshah shoh hapoh ka shnong bad ki la hap wan kem ïa kita ki briew kiba donkti halor katei ka jingjia.
Shuh shuh kitei ki nongïalam shnong ki la ïathuh ruh ba na ka liang ki pulit ki la ïathuh ba ha ka ‘Medical Report’ kaba ki pulit ki phah leh, ki la lap ba ka dei tang kaba rit bad kam dei kaba haduh katta katta.
Na ka liang u Sordar ka Raid Nongshken, u Bah Sukher Nongrum, u la pynpaw ba ki Rangbah Shnong ki dei kiba peit ïa ka bha ka miat, ka shongsuk shongsaiñ bad ki thrang ba kum ki nongshong shnong ki dei ban wan shakhmat lada don kaei kaei kaba jingjia khnang ba yn tip ïa ka jingsdang bad ka jingkut jong ka jingjia bad ba yn lah ban wanrah ïa ka jingsngewthuh ha baroh arliang mamla khlem da shah liang ïano ïano ruh.
U Sordar u la ong ba katkum ki dur-khih ne ‘video’ kiba la saphriang, la ïohi ba ka jingjia ïashoh ïadat ka don kaba long ka sakhi ba ka shnong kan shim bad leh da kaba tyngeh ïa kito kiba donkti. Hynrei kaba sngewsih pat ka long ba ka jingïaid lait jong katei ka longkmie na ki bor shnong ka dei kaba ym lah ban pdiang satia.
