Shillong, Risaw 12
Wat la u Bah Rocky Hek u khlem poi sha ka thong ha ka ilekshon MLA na ka seng NPP na Pynthorumkhrah konstitwensi, hynrei mynta ka kynti u la pynkhreh biang ban ïakhun sa ïa ka ilekshon MDC na Pynthorumkhrah-Mawkhar konstitwensi.
Haba ïakren bad u Bah Rocky ha kine ki sngi u la ïathuh ba un ïakhun biang ïa ka ilekshon MDC da kaba pan tiket na ka NPP kaba dei ka seng kaba u la ïakhun ïa ka ilekshon MLA ba dang shu dep.
Haba kylli katno ngut ki don kiba la pan tiket na ka NPP, u Bah Rocky um shym la tip eiei namar haduh mynta na Pynthorumkhrah u dang dei tang ma u hynrei um don jingtip eiei na ki thaiñ Mawkhar.
Katkum ki khubor ba la ïoh lum haduh mynta ki nongkyrshan ka NPP na North Shillong kim pat pynpaw ba ki kwah ban ïakhun ïa ka ilekshon MDC, hynrei ka dang paw tang ka kyrteng u Bah Rocky Hek na Pynthorumkhrah.
Kumban shu kdew ka Pynthorumkhrah-Mawkhar konstitwensi ha ka ilekshon MDC ka long kawei, katba ha ka ilekshon MLA ka dei la ka jong namar ki bym dei Khasi ki ïoh thep vote lang, bad ha ka ilekshon MDC ki nongthep vote ki dei tang ki Khasi.
Wat la u Bah Ransom Sutnga kyrtong ka NPP na North Shillong konstitwensi u khlem poi sha ka thong ha ka ilekshon MLA ba dang shu dep, hynrei haduh mynta ym shym la paw pyrthei la un ïakhun ne em ïa ka ilekshon MDC kumba kwah u Bah Rocky Hek na Pynthorumkhrah konstitwensi.
U MDC ba mynta jong ka Mawkhar-Pynthorumkhrah u dei u Bah Pynshngaiñ N Syiem u ban ïakhun biang na ka Congress.
Nalor ka NPP bad Congress kiba la paw kyrteng lypa kum ki kyrtong, la sngewthuh ba ka VPP, UDP bad KHNAM kin sa pynïeng kyrtong ha kane ka konstitwensi.
