Shillong, Risaw 13
Ka Myntri ka koit ka khiah jong ka sorkar jylla ka Kong Ampareen Lyngdoh kaba dei ruh ka MLA na East Shillong ka la ong ba ha u snem 2028 kan sa ïohi haduh 20 ngut ki MLA kynthei ki ban don ha ïingdorbar thawaiñ ka jylla.
Ïa kine kyntien ka Myntri la kren haba plie ïa ka Mega Career Awareness Programme ba la pynlong da ka Guwahati North East Chapter of EIRC jong ka Institute of Company Secretaries of India ha ka jingïatreilang bad ka tnad Commerce ka Shillong College, Meghalaya kaba la long mynta ka sngi Thohdieng ha phyllaw jong ka Shillong College.
Ka Kong Ampareen ka la ong ba ki ar ngut ki Symbud Myntri Rangbah ka jylla, kata u Bah Prestone Tynsong bad u Bah Sniawbhalang Dhar ki dei kiba la wan pule ha kane ka kolej, bad kumta ka la kyntu ïa ki samla pule ba ki dei ma ki ban mih bujli na ka bynta ka lawei ban ïalam ïa ka ri bad ka jaidbynriew.
Ka la ong biang ba ka 33 percent kaba la mynjur da ka Sorkar India kan poi palat 20 ngut ki MLA kynthei hadien ka ilekshon MLA ha u snem 2028 ban sa ïohi ha ïingdorbar thawaiñ ka jylla. Kumta ka la kyntu ïa ki samla pule ba kin mih shakhmat ban long ki nongmih bujli.
Kum ban shu kdew ki kynthei kiba mihkhmat ïa ki konstitwensi hapoh ka jylla ki don tang lai ngut hapoh ka jylla, kata ka Kong Ampareen Lyngdoh na East Shillong, Kong Santa Mary Shylla na Sutnga-Saipung bad Miani D Shira na Ampati.
Ka la ong ruh ba ki samla pule ba mynta ki dei ban pyntbit ïalade da ki bun jait ki kam khnang ba ki lah ban trei ïa ka kam lajong ynda ki la pyndep ïa ki jingpule.
