Nongpoh, Risaw:
Ka shlem treikam jong ka Meghalaya State Disaster Management Authority (MSDMA) ha ryngkat ka jingïatreilang bad ka shlem treikam jong ka Distrik Disaster Management Authority (DDMA) jong ka Ri Bhoi Distrik ha ka sngi Palei ki la pynlong ïa ka Mock Exercise kum shi bynta na ka jingpynkhreh lada wan ka jingkhynñiuh jumai kaba kham jur hapoh ka distrik bad ka jylla.
Ïa kane ka Mock Exercise la sdang thik ha ka por 9 baje mynstep da ka jingsawa jong ki siren kumba shi minit eiei lyngba ki kor pynsawa paidbah ha kaba la pynwandur ba ka la don ka jingkhih ba kynsan jong u jumai uba 7.1 katkum ka jingthew ha u richter scale.
Katkum ka skit kaba la pynkhreh, la ong ba ha kane ka jingkhynñiuh jumai ha kaba san tylli ki jaka kiba la shah ktah jur ki kynthup ïa ka shlem treikam u Deputy Commissioner ka Ri Bhoi, ka Civil Hospital Nongpoh, ka Nongpoh Filling Center, ka St. Paul’s Higher Secondary School lem bad kawei ka Nongpoh Shopping Town Complex.
La ïathuh ba ha kane ka jingkhih jong u jumai, ka la don ka jingkhyllem jong ka building ba saw mala jong ka skul St. Paul’s Higher Secondary School ha kaba shiphew ngut ki khynnah skul ki la mynsaw katba ha Civil Hospital Nongpoh, la ong ba ka la don ka jingkem ding jong katei ka jaka sumar, bad ym don satia kiba mynsaw.
Ha Nongpoh shopping Town Complex la ong ba ka la don ka jingkhyllem jong katei ka building kaba don bun mala bad kumba hynñiew ngut ki nongshong dukan ki la mynsaw jur. Ha Nongpoh Filling Center ka la don ka jingkem ding bad kumba lai ngut ki briew kila mynsaw jur katba ha ka ophis jong u Deputy Commissioner ka Ri Bhoi, kumba hynñiew ngut ki nongtrei ki la mynsaw jur na ka jingkhyllem jong katei ka building.
Lyngba kane ka skit kaba la pynkhreh, hadien ka jingkhynñiuh jong u jumai, la thaw ruh ïa ka Emergency Operation Center ha ka Conference Room jong ka ophis u Deputy Commissioner ka Ri Bhoi ha kaba la bthah ruh ïa baroh ki nongïashim bynta ba kin leh ïa la ki jong ki kamram bapher bapher kiba la bynta ha ki.
Ha kane ka sngi la wan ruh ban ïashim bynta naduh ki bor pulit ka Ri Bhoi, ki tnat sorkar bapher bapher, ka National Disaster Response Force (NDRF), ka North Eastern Police Academy (NEPA), ka tnat Fire & Emergency Services, ka tnat Civil Defence Quick Response Team, ki Civil Defence Volunteer, ka tnat jong ka koit ka khiah lem bad kiwei kiwei de kiba la shim ïa la ka jong ka bynta ba kynthup naduh ban pynlait im ïa kito kiba shah ktah ha u jumai, ban pynkit sha ki jaka ai jingsumar, ban pynlip ïa ka ding bad sumar ïa kito kiba la mynsaw bad kiwei kiwei de ki bynta kumba la mutdur ba lada don shisha ka jingkhih jumai.
Ka jingthmu ba kongsan ban pynlong ïa kane ka Mock Exercise ka long ban khmih bniah haduh katno ka Distrik ka long kaba la pynkhreh, ban khmih bniah kumno ki tnat treikam sorkar ki long kiba la pynkhreh lada kan don kum kine ki jingjia lashai lashisngi bad ba kin sngewthuh ïa la ka kamram kaba ki dei ban leh bad khamtam eh ban ai jingshai sha ki paidbah halor ka jingpynkhreh lada wan kum kine ki jingjia lashai lashisngi.
