Nongstoiñ, Risaw:
Ka Meghalaya State Disaster Management Authority (MSDMA) ha ryngkat ka jingïatreilang bad ki bor distrik ka West Khasi Hills Distrik ha ka sngi Palei jong mynta taïew ka la ïoh ban pynlong ïa ka Mock Drill Exercise kaba ïadei bad ka jingkhih jumai hapoh Nongstoiñ kaba dei shi bynta jong ka State Level Mock Exercise.
Ka jingthmu jong kane ka mock drill ka long ban tip la ki bor synshar distrik ki la pynkhreh ne em lada wan lynshop ki bor mariang kum u jumai bad ha kajuh ka por ka long ruh kum ka jingai jinghikai sha ki paidbah nongshong shnong, ba kumno kin leh lada wan jia ki bor lynshop jong ka mariang hapoh ka distrik.
Ïa kane ka drill exercise la pynlong ha ryngkat ka jingïatreilang bad kiwei pat ki tnat sorkar kum ka State Disaster Response Force (SDRF), Fire and Emergency Services, Police, Health Department, Civil Defence, AADPA Mitra volunteers, ki skul bad kolej kiba don hapoh jong ka distrik.
La sdang ïa ka drill da ka jingpynpah siren, bad ki distrik officer wut wut kila thaw ïa ka emergency respond protocol bad ban ïatrei lang bud sa da ki kynhun pyllait im, kiba la leit sha manla ki jaka ba la pynlong ïa kane ka mock drill na ka bynta ban ïoh pyllait ïa ki briew bad ïa ki jingri jingdup sha ki jaka kiba long shngaiñ. La ioh ruh ban thaw ïa ka relief bad medical camp bad kiwei kiwei ha madan ïalehkai jong ka skul St. Peters Higher Secondary School, Pyndengrei na ka bynta ban ïoh ai jingïarap sha ki shnong ki thaw kiba la shah ktah ha u Jumai.
U Deputy Commissioner ka West Khasi Hills Distrik uba long ruh u Chairman ka DDMA Bah Garod LSN Dykes IAS u la ong ba ka jingthmu kaba hakhmat eh jong kane ka Mock Drill ka long ban pyntikna ba lada wan kino kino ki jingjia shah lynshop ka mariang, yn lah ban ai ka jingïada ïa ki paid nongshong shnong.
Shuh shuh u la ai ka jingïaroh ruh ïa ka jingïatreilang jong ki tnat sorkar bapher bapher, ki shnong ki thaw bad ki paidbah baroh kiba la pynlong ïa kane ka Mock Drill Exercise kaba jop.
