New Delhi, Risaw 13
Ki shipai suiñ jong ka Israel ha ka Sngi Thohdieng ki la pyllait ïa ki video halor ka jingleit ther jong ki ïa 750 tylli ki shlem jong ka Hamas ha ka miet jong ka Sngi Palei ha Gaza Strip.
Katkum ka khubor ba la pyllait ha ka rynsan X, kitei ki shipai ki la ïathuh ba la ther da ki bom ïa ki jaka rieh jong ki dkhot ka Hamas kiba don shapoh khyndew, jaka peitngor, ïing sah jong ki nongïalam jong kane ka kynhun ki nongpyntriem, jaka buh tiar siat, shlem ba sam jingtip, bad ki nongïalam jong kane ka kynhun.
Ïa kine ki video ba la pynmih la shim na ka rynsan X jong ka Israeli Air Force mynta ka sngi.
Ka thma hapdeng ka Israel bad ka Hamas kan kot shi taïew thik lashai ka sngi. Kane ka thma ka la sdang hadien ba ki lehnoh Hamas ki la wan thombor ïa ki nong Israel ha ka Sngi Saitjaiñ.
Naduh ba sdang kane ka thma, ki la don palat 1,300 ngut ki nong Israel kiba la ïap, 3,200 ngut tam kiba mynsaw katba ki don da ki spah ngut kiba la shah rahbor ha ki lehnoh Hamas.
Ha Gaza Strip, ka jingïap briew na ka jingther ka Israel ka la kot sha ka 1,799 ngut katba palat 7,000 ngut ki la mynsaw.
