Shillong, Risaw 13
Ka Myntri Sorkar bad kawei na ki MLA kynthei, ka Kong Ampareen Lyngdoh ka la pynpaw ba ym don jingeh ei ei ïa ka ban pdiang ïa ki kyndon jong ki longshwa manshwa haba ïadei bad ka kyrdan Rangbah Shnong bad ka ong ba dei ban burom ïa ki longshwa kiba la saiñdur bad ïohi jngai ba ki rangbah ki dei ban ïalam ïa ki Dorbar Shnong.
Ka Kong Ampareen ka la pynpaw ïa kane haba kylli shaphang ka jingdon kiba pynkhih ban shimti ki kynthei ïa ka jinglong Rangbah Shnong.
Ka kyntien Rangbah Shnong ka la dei lypa kaba bynshet ha u rangbah ban kit ïa ka kam, bad lada don ka jingkylla na kaei kaba la bud baroh shikatta katkum ki riti ki dustur Khasi, ka mut ba yn don noh ki ‘Longkmie Shnong’ ha jaka ki ‘Rangbah Shnong.’
“Ki longkmie ki dei ki nongpeit nongkhmih ïa ka ïing ka sem bad ki khun ki kti. Ha shnong ha thaw, ki rangbah ki don ka bynta bakhraw. Ngi dei ban burom ïa ki kyndon ba la buh ki longshwa manshwa haba ïadei bad ki dorbar shnong. Ki rangbah ki don ka bynta bakhraw ban kit ïa ka shnong ka thaw. Ha ka miet ka ïong, dei ki rangbah kiba mih na ka bynta ka jingshngaiñ bad kam long kaba suk ïa ki kynthei,” ka la ong.
Ka Kong Ampareen ka la ong ba ha ka kam dorbar shnong, ki kynthei kim donbynta, hynrei ha ka jingtyllun ka por, ki don katto katne ki lynti ba ki longkmie ki donbynta kum ha ki VEC la pynkhlaiñ ïa ka iktiar ki longkmie bad ki Secretary jong ki VEC ki dei da ki longkmie.
Kane ka MLA ka la ong ba ïa ki Dorbar Shnong ka dei beit ha ki rangbah ban kit ban bah katkum ki kyndon ki longshwa manshwa, hynrei ha ki aiñ ilekshon ki kynthei ruh ki ïoh bynta.
Kumta ka Kong Ampareen ka la kyntu ïa ki para longkmie bad ki kynthei ban mih shakhmat ban ïashimbynta ban long ki nongthaw aiñ lyngba ka aiñ kaba la don mynta bad lada ïaid katkum ka bhah 33 na ka 100, kin don palat 20 ngut ki MLA kynthei ha Meghalaya ha ki snem ban wan ynda la treikam kane ka aiñ lehse ha u snem 2028 ne 2029.
Ka la ong ba ka ap khmih bad thrang ban ïohi ïa ki para longkmie bad ki kynthei ban ïashim bynta ha ka ilekshon ban long ki nongthaw aiñ.
