Shillong, Risaw 13
Ka jingpang dengue kaba dei kum ka jingpang ba jur ka shitmet, ka la ktah kumba 44 ngut ki briew ha West Garo Hills district, hynrei kumba ka long mynta, kiba ïoh ïa kane ka jingpang ki la duna ha kaba ki la don sa tang 2 ngut kiba dang shitom.
Uwei na kiba ïoh pang u la khlad noh, bad ka jingjur palat ka jingshit ka la pynlong ïa u ban khlad noh.
Haba ïathuh ïa kane sha ki lad pathai khubor ha ka sngi Thohdieng, ka Myntri ka tnat ka koit ka khiah, ka Kong Ampareen Lyngdoh ka la ong ba kane ka jingpang ym dei ba ka la ktah jur, hynrei ka kham kiew tang ha kine ki khyndiat sngi bad kiba shitom ki kham don ha ki jaka madan (plain belt) ka West Garo Hills district.
Ka Kong Ampareen ka ïathuh ba na ki 139 tylli ki nongmuna kiba la phah peitbniah ban pyntikna la ki dei kiba ïoh ïa ka jingpang dengue, la pyntikna ba 44 tylli ki dei kiba don ïa kane ka jingpang.
Ka la ïathuh ruh ba ha ka 3, 4 bad 5 tarik mynta u bnai, na ki 7 tylli ki nongmuna kiba la phah peitbniah, tang 2 tylli la lap ba ki dei kiba ïoh ïa kane ka jingpang.
Ka Kong Ampareen ka la ong ba ka tnat ka koit ka khiah ka la pynmih ïa ka jingbatai ba dei ban bud ryntih ha ki jaka ba don kiba ïoh ïa ka jingpang, bad ka kyntu ïa ki nongshong shnong ba lada don mano mano ba ïoh ka jingpang shit kaba neh kham slem, dei ban leit phah peit noh ha ki jaka sumar khlem pynslem shuh khnang ban ïoh ïa ka jingsumar.
“Ngim ïohi ban nang kiew kiba ïoh ïa ka jingpang namar ka la hiar mynta bad ym dei ban tieng ne sngew khuslai,” la ong ka Myntri, haba bynrap ba ka tnat ka koit ka khiah ka la shim ki lad ki lynti ha ryngkat kiwei pat ki tnat treikam kum ka municipal bad ki block.
Ka la ong ba ka jingwan kane ka jingpang lehse ka dei na ka daw ba jia ka jingjur slap, shlei um, bad bun ki skaiñ pyrjong. Kumta kane ka Myntri ka la kyrpad biang ïa ki paidbah khamtam ha kito ki jaka ba bun kiba shitom shitmet ban nym kheiñ sting tangba ym dei ban tieng ne khuslai, da kaba leit kloi sha ki jaka sumar lada ka jingpang shitmet ka neh kham slem.
