Gaza, Risaw 13 (UNI)
Kumba 13 ngut ki briew kiba la shah rahbor ha ka Hamas ki la khlad na ka jingther bom ka Israel ha Gaza ha ki 24 kynta ba la leit noh. Ïa kane la pyntip da ka Al-Qassam Brigades kaba dei ka kynhun kieng atiar jong ka Hamas ha ka Sngi Thohdieng.
Ki briew kiba nabar ri bad na Israel ki la shah pynïap ha ka jingther bom jong ka Israel ha ki thaiñ shatei jong ka Gaza bad hapoh Gaza City ha ki 24 kynta ba la leit noh, la ong katei ka kynhun ha u kyrwoh ba la pyllait sha ki lad pathai khubor.
La ong ba na kitei ki 13 ngut, 6 ngut ki la khlad ha ka thaiñ Shatei jong ka Gaza katba 7 ngut ki la khlad ha ki bynta bapher bapher jong ka Gaza City.
Kine 13 ngut ki dei kiba la shah rahbor ha ki lehnoh Hamas ha ka Sngi Saitjaiñ ha ka por ba ki la wan thombor na ki bynta ba shathie jong ka Israel. Nalor ka jingrahbor, ki la pynïap ruh ïa bun ngut ki nong Israel da kaba siat ïa ki lane da kaba ther da ki ‘nam ding.
Lah ban kdew ba ki shipai suiñ jong ka Israel ha ka Sngi Thohdieng ki la pyllait khubor halor ka jingleit ther ïa 750 tylli ki shlem jong ka Hamas ha ka miet jong ka Sngi Palei ha Gaza Strip.
