Hyderabad, Risaw 13
Ka jingleit khynra jong ka tnat Income Tax ha kawei ka ïing ha Bengaluru ka la ïalam sha ka jinglap ïa ka pisa kaba palat T. 42 klur ba la thep ha ki 22 tylli ki synduk kot bad ba la buhrieh ha khrum jingthiah.
Kane ka jingleit khynra ka la long ha ka miet jong ka Sngi Palei bad ka dei ka ïing jong kawei ka Corporator barim bad u kurim jong ka.
Ïa katei ka pisa kaba don da ki lut T. 500 la lap hadien ba la khynra ïa ka ïing sah jong ka Ashwathamma, u kurim jong ka, u R Ambikapathy bad kiwei pat ki bahaïing hasem jong kine arngut shi kurim.
U R Ambikapathy u dei u Vice-President ka Bruhat Bengaluru Mahanagara Palike (BBMP) Contractors’ Association kaba la kynnoh ba ka sorkar barim ha Karnataka ba la ïalam da ka BJP ka ju shim 40% kum ka ‘Commission’ na ka bynta ki projek.
La kynnoh ba ïa katei ka pisa la thmu ban wanrah sha Hyderabad lyngba ka Chennai na Bengaluru.
Na ka liang u Myntri ka tnat pla tyngka jong ka sorkar Telangana, u Harish Rao, u la kam ba katei ka pisa ka dei na ka bynta ban theh ha ka ilekshon ka ban long ha ka jylla Telangana. Utei u nongïalam ka seng Bharat Rashtra Samithi (BRS) kham hadien u la kam ba katei ka pisa ka dei kaba la lum na ki kontraktor bapher bapher bad ka long shi bynta na ka T. 1,500 klur ban phah na Karnataka ban pyndonkam ha ka ilekshon ha Telangana.
“Ki pyrshang ban theh pisa ha Telangana ban jop ïa ka ilekshon. Wat ïa ki tiket sha ki kyrtong ruh ki die, hynrei kin ym jop satia,” la kynnoh u Harish Rao.
Na ka liang u Working President ka BRS, u KT Rama Rao, u la kynnoh ba ka Congress ka theh da ki phew klur tyngka ha Telangana ban thied ïa ki nongthep ‘vote’ ha ka ilekshon ka ban long shen. Ka ilekshon ha Telangana kan long ha ka 30 tarik Naiwieng.
