Jowai, Risaw 13
Kum ka jingkyrshan ïa ki 22 ngut ki nongshna khiew khyndew kiba la dep shah hikai naduh ka 17-10-2022 haduh 03-03-2023 ha Common Facility Centre, ka Lurshai Pottery Cooperative Society Tyrshang, ka Dakti Kraft, Shillong da ka jingkyrshan ka Meghalaya State Skill Development Society kaba don hapoh ka tnad Labour, ka Sorkar Meghalaya ha ka kyrteng ka Skill Meghalaya ha ka 13 tarik Risaw ka la sam syrnot bad tiar jingïarap sha ki nongshna khiew khyndew kum ban kyntiew ïa ki ba kin nang pynheh shuh-shuh ïa ka kam shna khiew khyndew (Pottery).
Ka Dakti Kraft Shillong ka dei kawei ka seng kaba pynmih ïa ki tiar bad ai jingshakri ha kaba ïadei bad ki tiar shna kti kiba la buh pateng ki mynbarim bad ki tiar kiba ka pynmih dei kiba la shna da ki skhen ki siej, khyndew, rimet bad ki jait ksai ba pynmih ka mariang khlem da pyndonkam plastik.
Hashuwa ban sam ïa ki tiar jingïarap ka la don ka jingïalang ba la pynlong ha CFC ka Lurshai Pottery & Multipurpose Cooperative Society, Tyrshang ba la pynïaid da u Bah Lambormi Suchen, Skill Development Officer ha ka jingdonlang u Namphrang Diengdoh, Training Manager, Dakti Kraft, Shillong, u Daniel Syiemiong, Inventory Manager Dakti Craft, u Wanki Dkhar, Waheh Chnong ka Tyrshang, ki Executive Member ka Shnong Tyrshang, ka S.E. Kharpran Functional Manager ka DCIC Jowai, u Kmen Shylla, u Deputy General Manager ka NABARD, u G.N Kharlukhi, u Block Development Officer Dr. B.S. Langbang bad u General Manager ka District Commerce & Industries Jowai u B Warjri.
U Daniel Syiemïong, Inventory Manager, Dakti Craft, u la ong ïa mynta ka ïew ka ap ïa kiba kum kine ki tiar hynrei ki nongpynmih ki dang duna. Kumta ka long kaba donkam ban don shibun ki nongthaw khiew khnang ban lah ban pynmih shibun kum kine ki tiar bad u la ong ki tiar ba la shna da ki longkmie la lah ban pynïaid ïew shaduh sha Delhi ha ka ‘Meghalayan Age the Store’, ha ki ïew ‘online’ kumjuh shabar ka Ri India ruh.
U Deputy General Manager ka NABARD u la ïathuh ba na ka liang ka ophis jong u ka la ïoh ban sdang noh ïa ‘GI Tag Exercise’ na ka bynta ki nongthaw khiew ka District.
U Block Development Officer u la pynshlur ïa ki nongthaw khiew ban trei shitom shuh-shuh bad u la kyntu ban shim kabu ïa kane ka prokram khamtam eh ka ai jingïarap shibun ïa ki longkmie ha ki kam bapher-bapher.
U General Manager ka DCIC u la ong ba na ka liang ka ophis jong u kan ïai trei shitom shuh-shuh ha ka ban kyntiew ïa ka ïoh ka kot ki nongthaw khiew da kaba ïatreilang bad ki tnat treikam Sorkar bapher-bapher.
U Mithing Shylla uwei na ki nongthaw khiew u la pynsngew ïa ka jingsngewnguh ïa baroh kiba la ai jingïarap naduh ka Meghalaya State Skill Development Society ka Dakti Craft bad ki dkhot ka District Skill Committee kiba la trei shitom na ka bynta ki nongthaw khiew ban pynïoh ïa ka Training, ki Certificate bad ki ‘Start Up Tool’ ba ki ïoh ban pyndonkam ha ki jingtrei jong ki kiba man ka sngi.
