Shillong, Risaw 13
Ka tnad jngoh kai pyrthei ka jylla sa shisien mynta ka la pynbna paidbah ba kan pynlong biang ïa ka Shillong Cherry Blossom Festival ka ban sdang naduh ka 17 tarik haduh 19 tarik u Naiwieng, 2023 ha Madan Kurkalang Ri Bhoi District Sports Association (RBDSA) Sports Complex, Bhoi-rymbong, Ri Bhoi District.
Haba kren sha ki lad pathai khubor ha ka sngi Thohdieng, u Myntri ka tnad jngoh kai pyrthei, Bah Paul Lyngdoh u la ïathuh ba ka sorkar jylla ka la bei tyngka kumba T. 1 klur 99 lak na ka bynta ban pynlong ïa katei ka tamasa kaba ka jinglut baroh ka long kumba T. 9 klur.
“Ngi khmih ba ngin ïoh haduh 30 hajar ngut ki paidbah ki ban ïashimbynta man ka sngi jong kine ki lai sngi bad kumba ngi la ïohi ha ki snem kiba la dep ha kaba 90% na ki nongwan sha kane ka tamasa ki dei ki nongwan jngohkai pyrthei kaba mut ba kan wanrah ïa ka jingmyntoi ïa ka kam jngohkai pyrthei hapoh ka jylla”, la ong u Bah Paul.
Haba kylli halor ka jingpynkynriah jong ka sorkar ban pynlong ïa katei ka tamasa na madan Polo sha Ri Bhoi, u Bah Paul u la ong ba ka daw ka dei namar ba ka sorkar ka kwah ban pynkylluid ïa ka sor Shillong khamtam lei lei ba ka la dei lypa ka jaka kaba jur bha ka dheng kali.
“Sa kawei ruh katei ka madan Kurkalang ka long ka jaka kaba ngi lah ban pynrung ïa shibun ngut ki briew bad ba ka ïoh ka kot jong ki nongshong shnong ka thaiñ ha kylleng katei ka jaka kin ïohnong lyngba ka jingdon jong ki ïa ki jaka sah”, la ong u Bah Paul.
Ha katei ka tamasa Shillong Cherry Blossom Festival, yn sa don ki nongrwai bapawnam jong ka pyrthei kiba kynthup ïa u Ne-Yo, Ronan Keating, Sanam, Jonas Blue, Pink Panda, Kenny Musik, SURL bad kiwei kiwei.
Shuh shuh ha katei ka sngi kin sa don ruh ki nongrwai bad ki kynhun nongrwai bapawnam jong kane ka jylla kiba kynthup ïa ka Meba Ofilia, Bah Lou Majaw, Blue Temptation, Da Minot, Rhem, Dalariti, Wanjop Sohkhlet, Snow White, Banjop bad kiwei na ki jylla shatei lam mihngi ka ri. Ha katei ka tamasa kan sa don ruh ka Miss bad Mr Cherry Blossom Pageant, ka Cosplay Compeition, ka Choir Contest bad ka Karaoke Contest, ka Singing Contest bad kiwei kiwei ki jingïalehkai.
