Shillong, Risaw 13
Ka Synjuk ki Rangbah Shnong Border Area Raid Nongtung kaba kynthup ïa ki 22 tylli ki shnong ha khappud kaba tip ruh kum ka Block-II, ka la wan ban ud bad pynsngew ha u Chief Executive Member ka KHADC, u Bah Pynïaid Sing Syiem halor ka jinglum bai musur ïa ki mar rep bad ki dieng ïap ban thang ding ha ki khyrdop kiba don kumba 5 tylli ha khappud kiba pynïeng da ka tnat khlaw jong ka Karbi Anglong Autonomous Council (KAAC).
Kine ki khyrdop kiba la don naduh kham mynshwa, ki dei kiba la buh ha Sabuda, Umsyn-duk, Mawsladieng, Madan Umwang-Umsohphoh, bad Umjaknieh.
U President kane ka synjuk, u Bah Blik Sohtun, u la pynsngew ha u CEM ba haba ïadei bad ki jaka kiba buh ïa kine ki khyrdop ki hap ha ki jaka ban pynbeit ïa u pud u sam, bad la shaniah ha ki ar tylli ki Jylla ban pynbeit pud, hynrei ka jingdon kine ki khyrdop khrong khajna ka ktah namar ïa ki mar rep ruh la lum khajna kum na u sying bad ki jhur bad wat ïa ki dieng ïap ban thang ding ruh.
U la ong ba ïa ki khyrdop kim ong ei ei hynrei ka bym ïahap ka dei ka jingshim khajna wat ïa ki jhur, u sying bad ki dieng ïap kiba ju wan kit na ki khlaw shnong ban thang ding.
Na ka liang u CEM hadien ba la ïohsngew ïa kane na ki nongïalam shnong, u la phone hakhmat jong ki ïa u CEM ka KAAC, u Dr Tuliram Ronghang ban ïakren ïa kane ka jingeh bad kumjuh ruh u la phone ïa u MAC ka KAAC, u Abhijit Kro ba kine ki khyrdop kim dei ban lum khajna ïa ki mar rep kynthup ïa ki dieng ïap ba wan kit na khlaw shnong sha ïing ban thang ding.
“Ngin sa ïakynduh lang hapdeng ka EC ka KHADC bad ka KAAC haba ïadei bad kane khnang ban lah ban weng ïa ka jingeh kaba mih bad don jingshngaiñ hapdeng ki jaitbynriew kiba sah ha ki jaka khappud,” la ong u Bah Pynïaid.
U CEM u la ong ba ka thaiñ Block-II ka shngaiñ da ka jingleit jong ka EC kaba thymmai sha khappud ha ki khyndiat bnai ba la dep. U kyntu ruh ïa ki nongïalam shnong bad para jaitbynriew ban ïatylli bad ïatreilang na ka bynta ka bha ka miat ha kaba ka Council ruh kan thaw ki lad jingïarap.
U Bah Pynïaid u la ong ba ym dei ban don ka jingpynthut ïa ki kam pynroi.
“Ki paidbah kim dei ban shong syier, bad na ka liang ka EC ka KHADC lem bad ki EM bad ki MDC baroh lada don ba pynwit ngim salia ban hiar shiteng miet ruh,” la ong u CEM.
Halor ka jingpynbeit pud, u la ong ba ka KHADC ka donlang ha ki regional committee bad yn sa ïakren ha ka wat ba-ar jong ka jingpynbeit pud.
Na ka liang u President ka Synjuk ki Rangbah Shnong u Bah Blik Sohtun u la ong ba ki Khasi bad ki Karbi ki long kum shipara bad ngim dei ban don ka jingsngewthuh bakla.
“Ngi sngewdiaw ha kiwei ki bynta ba mih ka jingïakynad. Ka jingïakajia pud ka don hynrei ïa u pud u sam ngi shaniah ha baroh ar tylli ki Sorkar Jylla,” u la ong.
U Bah Sohtun u la ong ba ka Synjuk ki Rangbah Shnong Border Area Raid Nongtung ka sngewnguh ruh ïa u CEM Bah Pynïaid Sing Syiem bad ïa ka EC baroh kawei ha kaba u CEM bad ki EM bad MDC ki la wan sha khappud tang mar ïa shimti.
“Haduh mynta tang u Bah Pynïaid Sing Syiem kum u CEM uba la wan ïuhkjat bad wanrah lang ïa ki MAC na Karbi Anglong hangthie. Ngi sngewkmen ba naduh ba wan u CEM kam don kano kano kynrum kynram ha ka thaiñ jong ngi. Ngi shaniah ha u CEM ban shimkhia ïa ki jingpynsngew jong ngi,” la pynpaw u Bah Sohtun.
Na ka liang u MLA bad MDC ka Mawhati, u Bah Charles Marngar ruh u la ai khublei ïa u CEM bad EC ka KHADC namar dei tang kane ka EC kaba mynta kaba la shimkhia ban wan sha thaiñ khappud ha ki bnai ba la dep da kaba sngewthuh jingmut ruh bad ki nongmihkhmat na Karbi Anglong ban don ka suk ka saiñ hapdeng ki bashong basah hangthie.
U Bah Charles u la ong ba nalor ki khyrdop lum khajna la ïakren ruh haba ïadei bad ka jingkit shyiap ban pyntrei ïa ki projek nym shah pyndik.
Haba ïadei bad u pud u sam, u Bah Charles u la ong ba ki 22 shnong ka Raid Nongtung ki kren shai ban don ha Meghalaya bad la kyrpad ïa u CEM ban shimkhia khamtam ha kane mynta ba ïaid ka jingpynbeit pud ha ka wat ba-ar.
