Khliehriat, Risaw:
U Deputy Commissioner (DC) ka East Jaiñtia Hills Distrik, Khliehriat u la wer ïa ki nongshong shnong ka distrik kynthup ïa ki society kiba la dep pynrung kyrteng, ki kompeni, ki kynhun seng bad kiwei kiwei ki bym pat pynrung kyrteng hynrei kiba la ithuh da ka sorkar jylla kum ki SHG, Village Organizations, Producer Groups bad kiwei pat ba kin ïaleh ïa ka CM-Elevate Program.
Kane ka skhim ka thmu ban ai jingkyrshan ïa kito kiba kwah ban seng ïa ki kam ba bunjait.
Ka dei ruh ka Single Window application portal kaba la shna ban lum jingtip ha kaba ïadei bad ki jingdonkam bapher bapher jong ki paidbah kynthup naduh ka rep ka riang, ka thung ka tep, ri jingri, kam jngohkai bad kiwei pat.
Kiba kwah ban leh ïa kane ka skhim kin dei ki nongshong shnong kiba hapdeng 18-58 snem rta bad ki lah ban aplai da kaba leit lyngba ka CM-Elevate Portal bad ka tarik ba khatduh ka long ha ka 31 tarik Risaw 2023.
Ïa ki jingtip kiba kham bniah bad na ka bynta ki lad jingïarap, ki nong aplai ki lah ban phone sha u Help Line No. 85880-52636 bad ki lah ruh ban pan jingmut da ka e-mail lyngba ka e-mail address [email protected].
