Amman/East Jerusalem, Risaw 13
Ka United Nations Relief and Workers Agency for Palestine Refugees in the Near East (UNRWA) ha ka Sngi Thohdieng ka la ong ba ka jingbthah jong ki shipai Israel ban phah mih ïa palat 1 million ngut ki briew na ka thaiñ Shatei jong ka Gaza hapoh 24 kynta ka long kaba mar-mar bad kan nang pynsohsat ïa ki briew ha Gaza.
Ha u kyrwoh khubor, ka Israeli Defense Forces (IDF) ka la bthah ïa ki nongshong shnong ka Gaza City ban mih na kane ka jaka bad ban leit sha ki thaiñ Shathie jong ka Gaza.
“Ka IDF ka kyntu ïa baroh ki nongshong shnong ba kin mih noh namar kan long shngaiñ ïa ki hi,” la ong kane ka tnat shipai ha ka step Sngi Thohdieng da kaba bynrap ba ki lah ban wanphai biang sha Gaza City tat ynda la ai ïa ka jingpynbna ban ailad ba kin wan.
Ka IDF ka la ong ruh ba ki lehnoh Hamas ki pyndonkam da ki shlem kiba la tih shapoh khyndew ban rieh ha Gaza City. Katkum ki khubor, ka Israel ka don jingthmu ban phah da ki shipai shaduh sha Gaza Strip ban ïakhun pyrshah ïa ki lehnoh Hamas.
Haba bteng ïa u kyrwoh na ka UNRWA, la ong ba naduh ka 7 tarik Risaw, palat 4.23 lak ngut ki briew ha Gaza ki la kylla phet wir. Na kine, palat 2.70 lak ki la shong la sah noh ha ki shlem ba pynïaid ka UNRWA ha kaba la ai ïa ka bam ka dih, dawai dashin.
“Ka jingkloi bad jingheh jong ki jingeh jong ki nongshong shnong ka long kaba ishyrkhei. Kam shimpor shuh ïa ka Gaza ba kan khyllem,” la ong ka UNRWA.
Shuh shuh kane ka kynhun ka la kyntu ïa baroh ki mamla ba kin bat ïa ki kyndon ha ka por ba ïakhun thma bad ban ailad ïa ka jingpynpoi jingïarap sha ki paid nongshong shnong. “Ha Gaza, palat 2 million ngut ki la shah tan sha kane ka jingïakynad. Ka UNRWA ka mad ki jingeh ban pynbiang ïa ki lad jingïarap,” la bynrap katei ka kynhun.
