Shillong, Risaw:
Ka Hynñiewtrep Youth Council (HYC) War Jaiñtia Council ha ka Sngi Thohdieng ka la leit ban aiti da ka dorkhas ha ka Myntri ka tnad ka koit ka khiah ka sorkar jylla, Dr. Mazel Ampareen Lyngdoh halor ka jingdawa ban kyntiew kyrdan bad ban maramot noh ïa ka Primary Health Centre (PHC) kaba don ha ka shnong Pdengshakap ha Jaraiñ bad ha ka Dawki, bad kumjuh ruh ïa ka State Dispensary kaba don ha Padu bad ka Community Health Centre (CHC) kaba don ha Nongtalang kaba hap ha Amlarem Civil Sub-Division.
Haba kren sha ki lad pathai khubor hadien ka jingwan ïakynduh ïa ka Myntri ka Sorkar Jylla, u President jong ka seng, Bah T. Mukhim u la ong ba ka seng ha ki bnai kiba la dep ka leit ban khmih dalade ïa ka jinglong jingman jong baroh ki jaka ai jingsumar ha kaba ka la lap ba ki la don shibun ki jingduna ha kitei ki jaka ai jingsusmar kiba hap hapoh ka Amlarem Civil Sub-Division.
U Bah Mukhim u la ong ba ha katei ka jingleit jurip jong ka seng, ka la lap ruh ba ki don ki jaka ai jingsumar kiba ki doktor kim don satia ban sumar, ka jingbym biang ki jaka bret ñiut, ka jingbym don ki tiar ki tar ba paka ban ai jingsumar ïa ki paidbah katkum ka juk kaba mynta bad kiwei kiwei.
Na ka liang ka Myntri ka la ong ba kan sa shim khia halor katei ka jingpynsngew jong ka seng bad ka la ong ba ha ka 14 tarik u Risaw, 2023 kan sa leit ban khmih hi dalade ïa ka jinglong jingman jong kitei ki jaka ai jingsumar khnang ba kan tip bad ïohi hi da la ki jong ki khmat ïa ki jingduna jong kitei ki jaka ai jingsumar hapoh katei ka thaiñ.
