Shillong, Risaw 15
Wat la ka NPP ka dei ka seng saiñ pyrthei kaba synshar ha ka sorkar jylla bad ha KHADC, hynrei haduh mynta kam pat don kyrtong ban pynïeng ha Laban-Mawprem bad Jaïaw konstitwensi na ka bynta ka ilekshon MDC sha ka Khasi Hills Autonomous District Council (KHADC) ha u snem 2024.
Katkum ki khubor ba la ïoh lum na ki nongkitkam ka seng NPP, la ïathuh ba ka seng ka dang ap ïa ka rai jong u Bah Ricky Shullai; u pyrsa kur jong u Bah Sanbor Shullai uba dei MLA ka BJP na South Shillong konstitwensi ba un rung noh sha ka seng NPP ba un ïakhun na Laban-Mawprem konstitwensi.
La ïathuh ba ha kine ki sngi ka la don ka jingïakren bad ki nongkitkam ka NPP hynrei ym shym la ïoh jingtip shuh balei u Bah Ricky u slem ban rung sha ka NPP.
Ka jingbym don kyrtong ka NPP ha Laban ka dei hadien ba u MDC ba mynta u Bah Mitchel Wankhar u la leit ban pynïasoh ïalade sha ka UDP naduh ka ilekshon MLA ba dang shu dep namar u la ïakhun na ka UDP na Mylliem konstitwensi.
Ki khubor kiba ïajan ki la ïathuh ba lada ka NPP kam ïoh kyrtong ha Laban konstitwensi kan hap ban wad noh da uwei pat khnang ban suk ynda la pynbna ïa ka ilekshon.
Ha Laban-Mawprem konstitwensi kiba la thikna ban pynïeng kyrtong ki long ka UDP kaba la don lypa u MDC ba mynta, ka seng VPP bad ka NPP kaba dang wad ïa u kyrtong haduh mynta.
Katba ha Jaïaw konstitwensi kat haduh mynta ka NPP kam shym la ïoh kyrtong wat la kane ka seng ka don ïa u MLA barim ka West Shillong Bah M. Rapsang.
Ka jingbym pat ïoh kyrtong ka dei namar ki nongkitkam jong ka seng NPP kim nud ban pan tiket namar ki sngewtieng ïoh kim poi sha ka thong. Ka seng NPP ka dang ap ïa ka rai jong u Bah Rapsang bad u Bah Ransom Sutnga, u kyrtong ba shah rem ha ilekshon MLA na North Shillong namar ka Jaïaw konstitwensi ha MDC ilekshon ka kynthup ïa ar tylli ki MLA konstitwensi kata ka North Shillong bad ka West Shillong konstitwensi.
Katba ha Jaïaw konstitwensi kiba la thikna ban pynïeng kyrtong ki long ka UDP, VPP bad ka KHNAM.
