Jowai, Risaw 15
Ka Thomas Jones Synod College Alumni Association (TJSCAA) kum shi bynta ban wanrah ïa ka jingïajan hapdeng ki samla pule barim jong ka kolej ka la pynlong ïa ka jingïakynduh lang ha College Hall jong ka Thomas Jones Synod College, Jowai ha ka Sngi Saitjaiñ.
Ha kane ka sngi la ïadonlang ki nongpynïaid jong ka kolej, ki samla pule barim, ki nongïalam jong ka Alumni Association bad ka Kong I.R. Dan kaba la shongthait kum ka Secretary jong ka JHADC kaba la long kum ka nongkren ba kyrpang.
Ïa katei ka jingïakynduh lang la pynïaid da u Bah S. Plain, Vice-President jong ka synjuk.
La ïoh ïa ka jingkren lamkhmat na u Rev. L. O. Garod, President jong ka Alumni, ka jingkren na ka Dr. I. R. Dkhar, kaba la ïaroh ïa kane ka sienjam jong ka Alumni Association.
Ka phang pdeng jong kane ka jingïakynduh ka long, ‘Building our Community through our Professional Integrity’. Ka Kong I. R. Dan, kum kawei na ki nongpule barim ha ka kolej ka la batai bniah bad sani bha ïa ka jingdonkam ban don ka mynsiem ba sngur bad ba hok ha ka jingim shimet bad khamtam ha ka jingpyrshang ban tei ïa ka imlang-sahlang hi baroh kawei.
La pynphuh pynphieng ïa kane ka jingïakynduhlang da ki jingrwai bakyrpang na u B. Plain bad ka jingshad na L. Suchiang.
