Shillong, Risaw 15
Hadien phew kynta, ka ding kaba la bamduh ïa kawei ka ïing u hehspah ha Khyndai Lad la lah ban tem lyngba ka jingtrei borbah ki pulit pynlip ding kiba khlem shongthait naduh ba la ïoh jingtip sha-phang kane ka jingjia kaba la jia ha ka nohphai sngi jong ka sngi Saitjaiñ.
Hynrei ym shym la ïoh ka jingtip kaba tikna haduh katno phew tylli ki kali la wanrah ïa ka um lyngba ki kali pynlip ding jong ka tnat Emergency and Fire Service. La antad ba ki kali pynlip ding ki la wan na kylleng ki jaka ym shuh tang na Shillong.
Uwei u briew uba dei u manager jong ka dukan kaba don ha kane ka ïing kaba pluh, u la khlad namar ka jingïap op ba jur palat ka tdem.
Ka jingkhlaiñ jong ka ding bad jingneh slem khlem lip shuh, ka la pynlong ruh ïa ki pulit ban pyndonkam ïa ki kali pynlip ding kiba don ha kylleng ka nongbah Shillong bad ki kali pynlip ding na kiwei ki jaka.
La khot ruh wat ïa ki kali pynlip ding jong ki shipai ryngkew, shipai suiñ nalor kiwei kiwei ki shipai.
Ki jingdon jingem kiba don hapoh jong kane ka ïing ki la ingkhong bad ka ïing ruh ka la synjor bha.
Katkum ba la sngewthuh, ïa kane ïing ruh la hap ban pynpra noh shisyndon namar ka buh jingma ïa kiwei pat ki ïing kiba don marjan bad ïa ki nongïaid lynti.
Hynrei kat kane ka jingjia kaba la ktah lut ïa ki paidbah, ym don pat ka jingbatai shaphang kane ka jingjia da ki bor ba dei khmih naduh ka sngi ba sdang ka jingpluh.
