Shillong, Risaw 15
Ka phlim ‘Johkhe.com’ kaba dang pyni mynta ha Bijou Cinema, Shillong ka la leit ban ai jingïarap ïa ki bahaïing hasem kiba la duh noh ïa saw ngut ki mynsiem briew ha shnong Pynthorlangteiñ, West Jaiñtia Hills District kiba la khlad na ka jingban ka khyndew ha ka por ba ki dang ïohthiah lyngngai ha ka step jong ka Sngi U Blei ka 8 tarik mynta u bnai.
Ka kynhun jong ka phlim ‘Johkhe.com’ hapoh ka jingïalam u Bah Dao Toi, u Bah Marboon Laloo kiba dei ki trai bad u Tamiki Rymbai bad ki paralok ki la leit ha ka 11 tarik mynta u bnai sha shnong Pynthorlangteiñ ban ïakynduh ïa ki bahaïing hasem ban leit sngewlem bad noh jingïarap katba ki lah ka bor.
Kane ka longïing kaba la duh noh ïa baroh ki dkhot ka ïing ka kynthup ïa u kpa Bah Biangki Phawa 31 snem ka rta, ka kmie Kong Pynjanai Ryngkhlem 25 snem ka rta lem bad ar ngut ki khun Edify Ryngkhlem 6 snem ka rta bad Viladoroy Ryngkhlem 3 snem ka rta.
Haba ïakren bad u Bah Dao Toi, u la ïathuh ba ka jingleit sngewlem ïa ki bahaïing hasem ha ki sngi ba bud ka dei namar kim shym la don ha Jowai namar ki leit pyni ïa ka phlim ‘Johkhe.com’ ha Shillong.
U la ong ba kane baroh ka dei ka jingpynïaid U Blei najrong kum ki briew ki hap ban pdiang.
Ha kajuh ka por u la pyntip ba ki leit sha Pynthorlangteiñ ki ïakynduh ïa ki bahaïing namar na kane ka ïing kaba shah ban khyndew ki la khlad lut.
U la ïathuh haba u la poi sha katei ka jaka ka long kaba phylla ba kane ka khyndew ka ban beit tang ha kamra thiah hynrei ha kiwei ki bynta ka kam shym la poi.
Kum ban shu pynkynmaw, kane ka jingjia ba sngewsih ka la wan jia ha ka shnong Pynthorlangteiñ ha ka por mynstep ha kaba u slap bajur u la ther bad twa ka khyndew ban leit ban ïa ka ïing kat haduh baroh ki dkhot jong katei longïing ki la khlad hashen.
