Shillong, Risaw:
Ka Toyota Kirloskar Motor (TKM) ka la pyni paidbah ar tylli ki kali ba la shna na ka bynta ba kyrpang kiba dei jong ka kali Hilux, ïa kine ki kali la shna pynwandur da ka jingkyrshan jong ka jaka shna kali ba la aibor ban shna, ha East Tech 2023 (ET2023), kaba long ka rynsan pyninam ïa ki tiar ki tar teknology kaba ju long man la u snem ïa kaba la pynïaid da ka Eastern Command jong ka tnad shipai Indian Army ryngkat ka jingïatreilang bad ka sorkar Assam.
Ka jingthmu jong kane ka lympung ka long ban kyntiew ïa ki kam pynroi kiba dei na lade bad ka jingpynmih ïa ki kor ki bor kiba khlaiñ na ka bynta ki kam pahara, ban pynurlong ïa ka jingthmu ban pynbit pynbiang nalade ha ka liang ki jingdonkam ha ki bor pahara, bad pynkhlaiñ shuh shuh ïa ka jingpyrshang jong ka tnad shipai Indian Army ha ka liang ka jinglah ban ïatreilang, ban leh ïa ki jingwad bniah, bad ka jingwanrah ïa ki buit treikam thymmai jong kane ka juk mynta.
Ka TKM ka la shna pynwandur ïa ka Toyota Hilux khnang ba kan long ka kali kaba lah ban pynbiang ïa ka jingdonkam jong ki shipai Indian Army, hadien ba la leh ïa ka jingwad bniah ïa ka ïew. Ka kompany ka la wanrah shuh sa ïa ki ar jait ki rukom pynwandur ïa ki lai tylli ki kali: ka Field Diagnosis Vehicle (FDV) bad ka Forest Patrolling Vehicle (FPV). La shna pynwandur ïa ka FDV na ka bynta ba kan long kaba lah ban ïaid sha ki jaka kyndong bad ai jingkyrshan ïa ki shipai ha ki jaka pahara, katba ka FPV kan ïarap ban peit ïa ka jingsyntiat bad ka ïaid ka ïeng. Kine ki kali ki don ïa ki ‘Fog Light’ kiba lah ban ïohi bha mynmiet, ka lah ruh ban ring Video, bad shuh shuh na ka bynta ban leit ai jingïarap. Kine ki jingpynwandur thymmai ki pyni ïa ka jingtrei ba radbah jong ka TKM ban poi sha ka thong jong ka ‘Mobility for All’ ne ka ‘Jinglah jong baroh ban ïoh ïa ki kali’ ha kylleng ki ïew bad ki bynta. U Varinder Kumar Wadhwa, General Manager – Strategic Business Unit (East) jong ka Toyota Kirloskar Motor, u ong, “Haba peit nangne sha khmat, ngi sngewskhem ba ngin nang bteng ban ai ki jingkyrshan ba donkam ha ka liang ki bor pahara ban pynurlong ïa ka thong ba lah ban biang na lade.”
