Jowai, Risaw 15
Ka jingïalang hapdeng ka Hynñiewtrep Border Dispute Redressal Forum (HBDRF), nongïalam shnong, bad kynhun sengbhalang ha ka Sngi Saitjaiñ ka la pynpaw ïa ka jingpyrshah jur halor ka jingthmu ka Sorkar ban pynbeit shuwa ïa ka Psiar-Khanduli Sector ha ka jaka ban shimkhia ban pynbeit da kaba pynrung biang ïa ki shnong ha Block-I bad Block-II sha Meghalaya.
Haba kren ha ka jingïalang, u nongaiktien ka HBDRF, u Bah Thomas Passah u la ong ba da kawei ka sur, ki la shim ïa ka rai ban pyntikna ban wanrah biang ïa ka Block I & II sha Meghalaya.
U Bah Passah u la ong ba ki la rai ban pyrshah mardor ïa ka jingpyrshang ka Regional Committee lane ka Sorkar Jylla ban pynbeit ïa ka Psiar-Khanduli Sector (la ka jong), da kaba ong ba ka nongrim jong ka Block I & II hap ban ïakren baroh kawei namarba ka Psiar bad Khanduli ka dei bynta jong ka Block-I.
Kumta kano-kano ka jingpyrshang ka Sorkar ban kren tang ïa ka Psiar bad ka Khanduli bad lada paw ka jingshisha, ka synjuk ka la rai ban ïeng pyrshah bad kan ym kyrshan ïa ka jingïakren ki Sorkar arliang mamla.
U Bah Passah uba long ruh ‘Working President ka Khun Hynñiewtrep National Awakening Movement (KHNAM), u la ong ba ki Dolloi bad ki Waheh Shnong ki la pyntip ba ka Regional Committee ka dei ban kynthup ïa ki ha ka jingïakren pynbeit pud ban ïa kaba pynlong ïa ki tang kum ki nongrah shithi sha ka Regional Committee.
Haba pynkynmaw ïa ka jingkren u Symbud Myntri Rangbah ka Jylla, u Prestone Tynsong ba ka Block I & II kim dei satia ki jaka ba ïakajia bad ki donkam tang ban pynrung biang ne pynkynriah sha ka Meghalaya, u Bah Passah u kren shai ba um lah ban shaniah ïa ka Sorkar namarba ka la kylla ktien ha kaba ïadei bad ka Block I bad II ha kaba mynta la kynthup ïa ka Block I & II sha ki Karbi katkum ka ‘Notification’ u snem 1951.
Ha kato ka por, kam don jingïakajia ka Meghalaya bad Assam. Ka jingpynbna ba la pynmih ha u snem 1951 tang ïa ki jaka Pnar ban pynhap sha Karbi Anglong ban pynsuk ïa ka jingpynïaid kam ka bor synshar Sub-Division bad ka Khanduli kim donkam ban wan sha Jowai Sub-Division, bad ki lah ban pyndep kino-kino ki kam ha ki Sub-Division ba jan.
U la ong shuh-shuh ba ka jingthmu ka ‘Notification’ u snem 1951 kam don jingmut shuh hadien ka snem 1972 bad ka la ïap noh bad ba ka Block I & II ka la dei ban rung sha Meghalaya, hynrei ki daw ba bun kumjuh ki nongmihkhmat mynshuwa kim ïohi jngai bad kumta ka la wanrah ïa kane ka jingeh.
U la ban ba baroh ki shnong Pnar ki kwah ban pynrung ïa ka Block I & II, bad lada u Symbud Myntri Rangbah u ong ba kine ki jaka kim dei ki jaka ba ïakajia, ka HBDRF ka kwah ban ïohi ïa ka kam bad ka jingap kaba la slem bad ka jingkyrmen u paidbah ha Block I & II kan beit noh ha kane ka kynti.
Ka jingïalang ha kane ka sngi ka la rai ban thoh sha ka Sorkar ha kaba ïadei bad ka nongrim ba ki ïeng shuwa ba ka Regional Committee kan ai ïa ka jingmynjur halor ka jingïakren pynbeit pud jong ka kylla kaba ar.
