Nongpoh, Risaw 15
U Myntri ka Sorkar Pdeng uba khmih ïa ka tnad ka koit ka khiah, u Dr. Mansukh Mandaviya ha ka Sngi U Blei u la wan ban ïuh kjat ha Ri-Bhoi ban jurip ïa ka jingpyntreikam ïa ki skhim pynroi lyngba ka ‘Aspirational District’ bad ‘Aspirational Block Programme’.
Ha kane ka sngi la ïadonlang ruh ka Dr. M. Ampareen Lyngdoh, Myntri ka koit ka khiah ka Sorkar Jylla, Kong L. Sweety Changsan, Additional Secretary jong ka tnad Health & Family Welfare (MeH&FW), u Ramkumar S, Joint Secretary ka tnad Health & Family Welfare, u Arpit Upadhyaya, Deputy Commissioner ka Ri-Bhoi, u Giri Prasad, Superintendent of Police ka Ri-Bhoi District nalor ki heh ophisar na ki tnad treikam Sorkar bapher-bapher.
Ka jingthmu ba kongsan jong ka jingwan ïuh kjat utei u Myntri Sorkar Pdeng ka dei ban khmih bniah halor ka jingïaid shaphrang ki skhim pynroi kiba pyntrei kyrpang lyngba ka ‘Aspirational District’ khamtam ha kaba ïadei bad ka liang jong ka koit ka khiah. Ha kane ka sngi, u Dr. Mansukh Mandaviya u la leit ban jngoh ruh ïa ka Health & Wellness Center kaba don ha ka shnong Umsawnongkharai.
Haba kren ha ka jingïalang kaba la pynlong ha ka Conference Hall jong ka shlem treikam Deputy Commissioner ka Ri-Bhoi, u Dr. Mansukh Mandaviya u ong ba ka jingthmu ba kongsan eh jong ka ‘Aspirational District’ bad ‘Aspirational Block Programme’ ka long ban kyntiew ïa ki distrik kiba dang sahdien kum ka Ri-Bhoi ha baroh ki liang bad kyrpang eh ha kaba ïadei bad ka koit ka khiah.
Na ka liang utei u Myntri u la pynpaw ïa ka jingsngewhun halor ka jinglap ka jong u ïa ka jingpyntreikam ïa ki skhim ba la mang da ka Sorkar Pdeng bad kyntu ruh ïa ki ophisar ka distrik ba kin dang ïai trei shitom bad minot na ka bynta ban kyntiew ïa ka roi ka par jong ki paidbah nongshong shnong ka Ri-Bhoi.
