New Delhi, Risaw 15
Hapdeng ka jingpynkhreh ki shipai Israel ban leit rung sha Gaza Strip ban thombor ïa ki dkhot ka kynhun pyntriem Hamas, ki shipai Israel ha ka Sngi U Blei ki la kam ba ka Hamas kam ailad satia ïa ki paid nongshong shnong ka Gaza Strip ba kin mih ban leit sha ki bynta ba Shathie ba don markhap bad u khappud bad ka Egypt.
Mynta ka sngi, ka Israel Defence Forces (IDF) ka la pyllait paidbah ïa kawei ka jingïakren hapdeng u nongshong shnong ka Gaza ha kaba u la ong ba ki dkhot ka Hamas ki khanglad ïa ki paidbah ban mih na Gaza Strip.
Ka IDF, haba pyllait ïa katei ka jingïakren ha rynsan ‘X’, ka la thoh: “U nongshong shnong ka Gaza uba dang pyrshang ban mih ban leit sha ki bynta ba Shathie u la ïathuh ha u ophisar ka kynhun syntiat jong ka IDF halor kumno ki dkhot Hamas kim ailad satia ïa ki briew ba kin mih.”
Ka Hamas ka la kyntu ïa ki paidbah ba kim dei ban mih na ka daw ba ki surok bad ki lynti syngkien kim long satia kiba shngaiñ. U heh jong kane ka kynhun, u Ismail Haniyeh, u la ong ba ki nong Palestine ki dei ban shong beit ha la ka jong ka khyndew ka shyiap watla da ki hajar ngut ki nongshong shnong ki la hap ban mih noh na ki ïing ki sem naduh ba ka Israel ka la sdang ban kawang da ki bom.
Na ka liang ka Israel ka la kam ba ka Hamas kam ailad ïa ki briew ba kin mih khnang ba kan ïoh ban pyndonkam ïa ki kum ki stieh.
Naduh ba sdang ka jingïakynad hapdeng ka Hamas bad ka Israel ha ka 7 tarik Risaw, palat 1,400 ngut ki la shah pynïap ha Israel katba ha Gaza Strip, kumba 2,670 ngut ki la shah pynïap na ka jingther bom ka Israel.
