Shillong, Risaw 16
U Myntri Rangbah ka Jylla, Conrad K Sangma ha ka Lah Sngi U Blei u la hiar sha Thana Road ha Khyndai Lad ban jurip hi da la ki jong ki khmat ïa ka ïing maw (building) jong ki Singhania kaba la shah bamduh ha ka ding ha ka nohphai sngi jong ka Sngi Saitjaiñ ba la dep.
Kane ka jingjia pluh ding jong kane ka ïing maw ka la shim por haduh 24 kynta ban lah pynlip namar ka jingklang jong ka ding kaba la jur bha haduh katta katta.
Ha kane ka sngi ïa u Myntri Rangbah la synran lang da u Chief Secretary ka Jylla u Bah DP Wahlang, u DGP ka Jylla u LR Bishnoi lem bad ki heh ophisar, ka DC, u SP bad kiwei kiwei.
Ha kane ka jinghiar jurip ïa katei ka ïing maw, u Myntri Rangbah u la ïoh ruh ban ïashong jingïalang bad ki heh ophisar jong ka jylla, ha kaba u la bthah ruh ïa ki ophisar ba kin tohkit bad phah ïa ka kaiphod ba pura halor kane ka jingjia.
Nalor kane, u Myntri Rangbah u la bthah ruh ïa ki ophisar ba kin pynlong ïa ka ‘safety audit’ jong kane ka ïing bad ban pyntikna ïa ki daw jong kane ka jingkem ding.
U la ong, “Ka jingkem ding jong ka ïing ka la lah ban long kaba heh bad buh jingma ïa kiwei ki ïing, naba ka don hapdeng ka ïew, kaba jur ka leit ka wan ki paidbah bad kaba khapngiah bad kaba la buh jingeh shi katdei ïa ki kali pynlip ding ban poi mar-mar bad kaba la dei ruh ka jingïaleh kaba eh bha, hynrei ka jingtrei shitom da ki tnat baroh ryngkat ki pulit pynlip ding, ki bor district bad khamtam ki shipai lem bad ki nongshong shnong ban ïatreilang bad mih ryntih, la lah ban tem ïa ka jingpur jong ka ding bad ban tem ïa ka jingkham sniew jong ka jinglong jingman.”
U Myntri Rangbah u la ai ka jingïaroh sha baroh kiba la don bynta ha kane ka kam ban pyntikna ba ka ding kaba klang kan ym pur sha kiwei pat ki ïing kiba don syndah bad kane ka ïing maw.
Ha kajuh ka por u la pyntip ba kan sa don ka jingtohkit kaba bniah halor kane ka jingjia ban lap ïa ka daw tynrai kaba la lam sha ka jingpluh jong kane ka ïing.
“Ka long kaba donkam ba ngin khmih bniah bha halor kane ka jingjia khnang ba ngin sa lah pat ban thaw ïa ki lad ki lynti kumno ba ngin lah ban tehlakam bad kiar na kum kine ki jingjia hadien habud,” la bynrap pynkut u Conrad.
