Shillong, Risaw 16
Ka Khasi Authors’ Society (KAS) ha ka Lah Sngi U Blei ka la pynsngew ha u Myntri Rangbah ka Jylla, u Conrad K. Sangma ban pynlong noh ïa ka ktien Khasi kum ka ktien Sorkar ba pura (Official Language) jong ka Jylla da kaba wanrah jingkylla ha ka Meghalaya State Language Act, 2005.
Haba kren sha ki lad pathai khubor hadien katei ka jingïakynduh, u President ka KAS, Dr. D.R.L. Nonglait u la ong ba ka seng ka la ai jingmut ïa ka Sorkar ban pynlong noh ïa ka ktien Khasi, ka ktien Sorkar pura jong ka Jylla.
“Haduh mynta ïa ka Khasi dang pynlong tang kum ka ‘Associate Official Language’, kaba mut tang ka ktien bynrap. Kumno ka ktien ki trai shnong kan long ka ktien bynrap katba ka ktien nongwei kan long ka ktien Sorkar,” u la buh jingkylli.
U la ong ruh ba ka seng ka la kyrpad ïa u Myntri Rangbah ban wanrah noh ïa ka jingpynkylla ha ka Meghalaya State Language Act, 2005 kaba kdew ba ka Khasi bad ka Garo ki dei ki ktien bynrap.
“Mynta da kaba wanrah ïa ka jingpynkylla, yn lah ban pynlong noh ïa ka Khasi ka ktien Sorkar ba pura jong ka Jylla,” u la ong.
Na ka liang u Dr. Nonglait u la ïathuh ba u Myntri Rangbah u la kular ba ka tnad ba dei khmih kan sa peit bniah ïa katei ka kam, ha shuwa ban wanrah jingkylla ha katei ka aiñ.
Halor ka jingpynrung ïa ka ktien Khasi ha ka Khyrnit ba 8 ka Riti Synshar ka Ri, u la pyntip sha u Myntri Rangbah ba ha ka 29 bad 30 tarik jong u bnai ba la dep, ka seng ka la pynlong ïa ka ‘National Seminar’ ha nongbah New Delhi bad ka jingshong kyllaiñ mungor ha Jantar Mantar.
“Ngi la shim ruh katto-katne tylli ki rai – ban pan jingpynshai na ka tnad kam pohïing ka Sorkar Pdeng hangno kane ka jingdawa jong ngi ka don mynta. Ngi la shim ruh ïa ka rai ban kyrpad na ka Sorkar India ban wanrah noh ïa ka ‘Official Bill’ na bynta ban plie lad ha ka ban pynrung ïa ka ktien Khasi ha ka Khyrnit ba 8 ha kane ka dorbar ka ban sa long,” la ong u President ka KAS.
Haba kdew ba kam ju don ka jingïatai haba wanrah ïa ki ‘Private Members Bill’, u la ong ba ka seng kam kwah shuh ba ki MP (jong ngi) kin rah tang ïa ki ‘Private Members Bill’ hynrei ka Sorkar ka dei ban wanrah noh da ka ‘Official Bill’ kaba lehse kan pynurlong ïa ka jingdawa ban pynrung ïa ka ktien Khasi ha ka Khyrnit kaba 8.
Haba pynkynmaw ba ka seng ka la phah dorkhas sha u Myntri ka tnad kam pohïing ka Sorkar Pdeng, Myntri Rangbahduh ka ri kumjuh sha ka President ka Ri India halor katei ka bynta, u Dr. Nonglait u la ong ba ka seng ka la pyntip sha u Myntri Rangbah ba ka la dep ai ïa kitei ki dorkhas ryngkat ki kopi sha u na bynta ba un buddien ïa katei ka kam.
Shuh shuh u la bynrap, “Ngi la kyrpad ïa u ba un thoh shithi sha u Myntri Rangbahduh ka ri, Myntri ka tnad kam pohïing ka Sorkar Pdeng bad ban kyrpad kumba kyrpad ma ngi – kam dei ban ïapher na ngi. Ka jingkwah jong ngi ka long ban wanrah ïa ka ‘Official Bill’ ha Parliament ha ka dorbar ka ban wan bad u la kular ban phah ïa ka shithi buddien ha kane ka taïew ban wan.”
