Shillong, Risaw 16
Ka seng ki nongdie madan, ka Meghalaya & Greater Shillong Progressive Hawkers and Street Vendors Association (MGSPHSVA) ka pynpaw ka jingsngew -sih bad jingsngewlem ïa ka longïing jong ki Singhania kiba la duh noh ïa ka ïing namar ka jingbam duh jong ka ding myn ha ka Sngi Saitjaiñ.
Ka seng ka phah ruh ka jingsngewlem sha ki bahaïing jong uba la khlad noh ha katei ka jingpluh ding kaba shyrkhei.
Ha kawei ka liang, ka seng lyngba ka kyrwoh na u General Secretary, Bah Shane Thabah ka pynpaw ka jingsngewdiaw bad jingpyrshah jur halor ki jingkynthoh bad jingkynnoh jong ki katto-katne kiba ong ba ki nongdie madan ki khang lynti ïa ki kali pynlip ding bad kumta ka ding ka ïoh lad ban bam shngiam ïa ka ïing kaba la ing.
“Ka seng ki nongdie madan kam lah ban pdiang ïa kum kine ki jingkynnoh ki bym shong nia,” u la ong.
Ha ka jingshisha ka seng ka kyntu ïa ki bor shnong ne bor distrik ba ki dei ban ïit khmih ïa ka jinglong ka Sor Shillong mynta halor ka jingtei thurmur ïa ki ïing ki sem bad ban pynlong ka jingjurip kaba bniah halor ka rukom shna ïa ki ïing ki sem bad ki dukan paki dulan,” la ong u Bah Thabah. Ha kajuh ka por, u la ong ba dei ban thaw ïa ka kynhun jurip kaba laitluid ban jurip halor ka jingshngaiñ jong ki ïing, ki jingtei ïing bad ki dukan paki dulan kiba don ha Khyndai Lad bad kylleng ka nongbah.
Ka seng ka kren shai ba ha kine ki phew snem ba la leit noh la pynjot ïa ka sor Shillong da ka jingrhah spah bad jingkhwan myntoi shimet bad ki nongkhaïi, ki ‘riewshimet ki leh katba mon haba ki tei ïa ki ïing bad kiwei ki jingtei kim salia ïa ki aiñ ki kyndon bad ki pynkheiñ pylleiñ-pylleiñ ïa ki. “Ki bor ba dei khmih ruh kim pushe ne kitkhia,” u la ong. Ka seng haba pynkynmaw ïa ka jingpluh ding jong kawei ka Ïingmane ha Qualapaty ha kaba la duh noh ïa 2 ngut ki mynsiem briew, ka la ong ba ha katei ka jingjia ki kali pynlip ding kiba heh kim shym lah satia ban rung sha ka jaka namar ka jingrit jong ka surok kali.
“Kajuh ka jingjia pluh ding ka la jia ha ki khyndiat bnai ba la lah ha kaba ka skul KJP Girls Higher Secondary School ha Mission Compound ka la ingkhong bad ha kane ruh ki kali pynlip ding kim lah satia ban poi haduh ha shen namar kim lait ban rung naba khim palat ki surok,” la ong biang utei u nongïalam.
Shuh shuh u la bynrap ba ha ka jingshisha ha ka jingpluh ïing ha Khyndai Lad ha ka Sngi Saitjaiñ, ki nongdie madan bad ki dkhot ka seng ki la lum mar-mar ïa ki mar ki mata jong ki bad khang mardor ïa ki jingdie.
Ha kajuh ka por, ki la mareh ruh sha ka jaka ba pluh ban ai ka kti jingïarap wat la ki dei ban buh ïalade ha ka jingma.
“Kumta ki nongdie madan kim shym la khang lynti, pynban ki la ai ka kti jong ka jingïarap,” la ong ka seng.
Na ka liang ka seng ka la pynpaw ba ka long kaba kloi ban ïatreilang bad ki bor distrik bad Sorkar ban tei bad pynlong ïa ka Sor Shillong kaba shngaiñ bad kaba burom kylliang.
