Shillong, Risaw 16
U Cardinal Pierbattista Pizzaballa, uba dei u Latin Patriarch ka Jerusalem, u la pynpaw ïa ka jinglong kloi ka jong u ban ïapeiñ dalade tang ban ïoh biang ïa ki khyllung khynnah kiba la shah rahbor ha ka kynhun pyntriem Hamas, bad u la batai ruh shaphang ka jingpyrshang ka Holy See na Vatican ban ïadon bynta ha ka jinglong ksiang ha ka jingïakynad ha Gaza bad ka Holy Land.
Ka kotkhubor Vatican News ha ka Lah Sngi U Blei ka la pynmih ïa ka khubor ha kaba ka long ba ha ka jingïakynduh bad ki nongthoh khubor, u Cardinal Pierbattista Pizzaballa, u la pynpaw ïa ka jingsngewkhia halor ka jingshah rahbor jong ki khyllung khynnah ha ka Hamas.
“Hato nga long uba kloi ban ïapeiñ dalade? Ngan leh ïa kano-kano kaba donkam lada ka lah ban wanrah ïa ka jinglaitluid bad ban ïoh ban wan ïalam biang ïa kito ki khyllung khynnah sha ki ïing ki sem jong ki. Na ka liang jong nga, nga la long uba kloi,” la ong utei u Cardinal.
U Cardinal Pizzaballa u la kren ruh halor ka jinglong kloi jong ka Holy See na Vatican ban long ksiang ha kane ka jingïakynad bad u la ban jur halor ka jingthrang ban ïoh pyllait ïa kito kiba la shah rahbor.
“Ngi la dep tyrwa ïa ka jinglong kloi ka jong ngi ban pyrshang ban wanrah ïa kito ki briew kiba la shah rahbor. Ka long kaba eh namar ban ïakren donkam ïa ki ksiang. Hynrei kumba ka long mynta, ka jynjar ban ïakren bad ka Hamas,” u la bynrap.
Halor ki khubor ba ka Israel ka la long kaba kloi ban phah tur da ki shipai ki swar jong ka sha Gaza Strip, utei u Cardinal u la pynpaw ïa ka jingsngewkhia halor ki ar bynta. Ka banyngkong ka long ba ka jingeh ba ki nongshong shnong ki ïakynduh mynta kan nang kham jur bad lada don kata ka jingleit tur ki shipai Israel, ki lanot ki lah ban nang kham bun. Ka ba-ar ka long ba ka jingïakynad kaba mynta ka lah ban ïalam sha ka jingïakynad kaba kham heh namar kan ym long shuh tang ka Gaza ne ka West Bank, hynrei ka Ri Lebanon katba ki Ri Islam bad Ri Arab ki lah ban ïakhih.
“Ka long kaba eh ban batai lypa ïa kaei ka ban jia, hynrei ka jingsheptieng ba kane ka jingïakynad kan nang heh ka don, bad ym dei tang ma nga uba ong ïa kata,” la bynrap pynkut utei u Cardinal.
