Shillong, Risaw 16
Ka Sorkar Jylla lyngba ka tnat Disaster Manage-ment ka la kylli na ka tnat pynlip ding ïa ki jingdonkam kiba kham hakhmat eh kynthup ïa ki kali pynlip ding kiba kham rit kiba lah ban poi kloi sha ki jaka ba pluh khamtam lada ka jaka ba jia ka jingpluh ka dei kaba khim ka lynti ïaid.
Haba ïakren bad u Sanjay Goyal uba dei u Commissioner and Secretary uba peit ïa ka tnat Disaster Management, u la ong ba ka Sorkar ka la pan na ka tnat pynlip ding ïa ki jingdonkam kiba kham kyrkieh kynthup ïa ki kali pynlip ding kiba kham rit.
“Ka jingpynthymmai ïa ki tiar kynthup ïa ki tiar pynlip ding ki la don lypa ha ka jingthmu bad la bthah ïa ka tnat ba dei khmih ban phah noh kloi ïa ki jingdonkam khnang ban tip ïa ka jingdon pisa bad lada ym don, ngin pyrshang ban nang mang katto katne lyngba ka Disaster Management Fund,” la ong u Goyal.
U la ong ba ka jingkhlaiñ jong ka um kaba tan na ki kali kiba kham rit ruh ka kham tlot bad ka um ruh ka don tang khyndiat namar la batai ba lada pyndonkam ban synreit um katkum ka jingkhlaiñ jong ka um kaba tan ha u pipe, ka um kan lut noh tang hapoh lai minit namar ki dei ki kali pynlip ding kiba rit bad ka um ka don tang kumba 2000 litar lane 3000 litar.
Hynrei u Goyal u la ong ba kum kine ki kali ki kham sted ban poi sha ka jaka ba pluh namar lada khim ki lynti ne surok ruh ki lait beit ban ïaid ym kum ki kali pynlip ding kiba heh.
“Kumta ha kaba sdang ngi lah ban phah shwa da kum kine ki kali kiba rit tang ban ïoh tem ïa ka ding, bad yn phah wan lypa ïa ki kali kiba heh ban ïeng kham shajan ban synreit ha ka jaka ba pluh da kaba pyndonkam da u pipe uba jrong namarba mynta ki don ki pipe kiba jrong haduh 200 mitar bad kiba khlaiñ bor ban synreit um.
