Shillong, Risaw 16
U Bah Alexander Laloo Hek uba dei uwei na ki nongïalam ka seng Bharatiya Janata Party (BJP) ha Meghalaya bad ha kajuh ka por uba dei ruh u Myntri hapoh ka Sorkar MDA u la ong ba u long uba kloi ban ïakhun ïa ka ilekshon MP lada na ka liang ka seng ka ibit bad ai tiket ha u.
“Nga long uba kloi ban mih shakhmat ban ïakhun ïa ka ilekshon MP sha Lok Sabha, lada na ka liang ka seng ka ibit bad ai ka tiket sha nga,” la ong u Bah A.L Hek haba kren sha ki katto katne ki lad pathai khubor.
U Bah Hek uba la jop haduh hynriew sien kynthih ïa ka ilekshon MLA na Pynthorumkhrah konstitwensi u la ong ba ka rai ban ïakhun ilekshon ka shong beit ha ki nongïalam ka BJP na Delhi namar ha shwa ban jied bad pynbna ïa ki kyrtong kan don shwa ka jingpeit bniah ïa ki kyrtong kiba lah ban wanrah jingjop ïa ka seng ha ka ilekshon.
Lah ban pynkynmaw ba ha ka ilekshon MP kaba la dep ha u snem 2019, ka BJP ka la pynïakhun da u Bah Sanbor Shullai uba dei u MLA ka South Shillong, hynrei um shym la ïoh ïa ka jingjop bad u la wan balai.
Haba phai pat sha ka ilekshon MLA kaba dang shu dep hapoh Meghalaya, la sakhi ba ka BJP kam shym la lah ban leh bha wat la khmih lynti ba kan jop kham bun ki MLA. Pynban ha kaba kut kane ka seng ka la jop hi tang 2 ngut.
Halor kane ka risol jong ka ilekshon MLA ba la dep ha Meghalaya, na ka liang u Bah Hek u la kubur ba ka BJP ka khlem lah ban leh bha da kaba ai daw ruh ba ki nongshong shnong ka Jylla haba ki jied, ki jied ïa u ne ka kyrtong bad kim ju jied satia ïa ka seng.
“Ka BJP ka dei ka seng kaba long tylli kawei kata naduh ki Mandal bad kumta ngim dei ba ngi trei tang lada don ki ilekshon bapher bapher,” la bynrap pynkut u Bah Hek.
