Nongstoiñ, Risaw 16
Ka jingshah ieh khongreng khlem da lah ban pynbha lane maramot shuh ïa ka surok kaba na Zero Point (Jingkieng Nanbah) haduh ka Lad Wahriat kaba don tang 377 meter bad kaba dang hap hapoh ka shnong Upper New Nongstoiñ, ka la pynlong shisha ka jinglehraiñ ïa ka sor Nongstoiñ ha kajuh ka por ka jingeh ha ka ïaid ka ïeng namar ka jingnang sniew jong kane ka surok.
Halor kane ka surok, ka Hynñiewtrep Achik National Movement (HANM) West Khasi Hills ha ka Lah Sngi U Blei ka taïew, ka la leit ban ïakynduh ïa u Deputy Commissioner ka West Khasi Hills bad aiti ruh ïa ka dorkhas ban kyrpad ba un tuklar ban bthah shim khia.
U Bah Willstone Sohshang, President ka HANM West Khasi Hills u la ong ba ha ka jingpyrkhat jong ka HANM lyngba ka jingpyntrei ïa ka surok lane ka projek, na Nongstoiñ sha Wahkaji, kane ka surok ka hap lang ha kajuh hi ka mang, hynrei kaba lyngngoh ka long ba la ïoh jingtip ba ïa kane ka jingtrei la sdang pat tang na Lad Wahriat sha Wahkaji.
Nalor nangta, u la ong ruh ba kane ka surok ha ka jingshisha ka dei ka surok kaba la shah ieh khongreng da ki bun bun snem kaba ym shym lah ban leh eiei haduh mynta.
Nalor kata, u Bah Willstone u la ong ruh ba ka long kaei kaei kaba sngew lyngngoh haba ïoh jingtip ba ïa kane ka surok kaba tang 377 metre la shu ieh khongreng kumto bad kane ka long ka jinglehraiñ ïa ka sor Nongstoiñ hi baroh kawei halor ka jingbym pyntrei ïa katei ka surok.
“Ngi la ïohi da la ki jong ki khmat ha kaba kane ka surok kam i kop shuh ba ka dei ka surok hapoh sor Nongstoiñ, kumta ka HANM ka la kyntu ïa u DC ba un tuklar lem halor katei ka surok ba un khmih bad thawlad ïa katei ka surok ba un ïakren bad ka tnat PWD na ka bynta ban pynbha ïa katei ka surok,” la ong u Bah Willstone.
Shuh shuh u la ïathuh ruh ba ha ka jingïakren bad u DC, u la pynpaw ba un sa khot ïa ki ophisar ka tnat ba dei peit ban thawlad katba lah ban pynrung ïa katei ka surok bad ka jingpyntrei ïa ka surok Nongstoiñ-Wahkaji.
