Umroi (Meghalaya), Risaw 16 (UNI)
U heh shipai ka Bangladesh, u Major General Chowdhury Mohammed Aizizul Haque Hazary ha ka Lah Sngi U Blei u la ong ba ka Bangladesh kam shym long ka jaka rieh tngen jong ki lehnoh bad bynrap ba ym don jaka na bynta ki kam kieng atiar/lehnoh ha khyndew ka Bangladesh.
“Nga lah ban ong (Bangladesh) kam shym la long ka jaka rieh tngen, ka dei ka ri kaba ïoh jinglaitluid lyngba ka ‘Liberation War’. Bad ka Myntri Rangbahduh jong ngi, (Sheikh Hasina) ka la ïai ban barabor ba ym don jaka na bynta ki kam lehnoh ha khyndew ka Bangladesh,” la ong u Hazary ha u UNI hadien ka SAMPRITI-XI kaba la long hapdeng ka India bad Bangladesh ha Joint Training Node, Meghalaya.
Ka kynhun na Bangladesh ka kynthup ïa 170 ngut ki shipai jong ka 52 Infantry Brigade katba ka kynhun na India ka kynthup ïa 170 ngut ki shipai jong ka15th Battalion The Rajput Regiment, 66 Mountain Brigade. Katei ka prokram kaba la long ha Joint Training Node ha ka 3 tarik Risaw, ka la kut noh ha ka Lah Sngi U Blei.
“Lada phi ïakren ïa kane (jaka rieh tngen) ngi baroh ar ri (India bad Bangladesh) ngi ïatreilang ba kynthup naduh ka jingïasam jingtip bad ha ka kyrdan jong ka Jylla, kumjuh ka don ka jingïasnohktilang bad baroh ar ri ki don ïa kajuh ka jingsngew ban tehlakam ïa ki kam lehnoh,” ong u General Officer Commanding 17 Division & Area Commander Sylhet Area.
Haba kdew ba ka Jamaat-e-Islam lem bad kiwei-kiwei ki kynhun ki dang treikam ha Bangladesh, utei u heh shipai u la ong, “Ki lah ban don ki Jamaat hynrei ki lehnoh kim wan na kawei ka bynta bad ki lah ban wan nangno-nangno. Hynrei haba ngi sngew ba don kiba kum kine ki jingma, ki shipai ki long kiba la khreh ban ïaleh pyrshah ïa kata ka jingma bad lada i donkam, ngi pan jingkyrshan na ki paralok India jong ngi.”
“Ka phang jong ka prokram ha kane ka kynti ka long ruh ban lah ban pynduh jait ïa kine ki jait kam (lehnoh) kiba saphriang ha kylleng ka pyrthei bad kum baroh ki ri kiba burom ïa ka roi ka par, ïoh ka kot, ka jingmanbha jong ki paidbah, kumta ngi ruh ngi long kiba la khreh kumba long lem kiwei pat,” la ong u Hazary.
U General Officer Commanding ka 20 Mountain Division ka shipai India, u Major General Ajay Feroze Shah u la ong, “Uno-uno u shipai u long uba la khreh na bynta kino-kino ki jingjia bad baroh 2 kynhun shipai ki long kiba la khreh barabor ha baroh ki liang.”
Ïa kane ka ‘Indo-Bangladesh Joint Exercise’ la pynlong man u snem – la ka jong ka jong ka pali da ka India bad Bangladesh hapoh ka kyrteng jong ka ‘SAMPRITI’.
“Ka jingseisoh jong kane ka prokram ai jinghikai ka long u mawmer uba kongsan ha ka ban pyntikna ïa ki jingïadei ba ïajan hapdeng kine ki 2 ri. Nalor ban kyntiew ïa ka jingsngewthuh bad ka jingpyndonkam ïa ki kor ka juk stad mynta ban ïasam jingtip hapdeng ki 2 kynhun shipai, ka la nang ïarap ha ka ban pynkhlaiñ ïa ka jingïadei hapdeng kine ki 2 ri,” la ong u nongaiktien, Wing Commander Sreeprakash J uba na Shillong.
