Nongstoiñ, Risaw 17
Ka jingshakri kaba la ai da ka Shallang PHC sha ki nongshong shnong ka la long tang ka jingshakri pyndep rukom, namar ym don doktor mynta la kumba ar bnai eiei.
Ïa kane la pyntikna bad lap ruh da ka Khasi Students’ Union (KSU) Lyngngam Hynnengbrei Area Unit hadien ba ka la leit ban jurip ïa ka Shallang PHC, halor ka jingïoh ïa ka jingujor na ki paid nongshong shnong halor ka jingbym don doktor ha katei ka PHC.
Halor kane ka bynta, ka KSU Hynnengbrei Area Unit hapoh ka jingïalam jong u President, samla Anselm Ryntong, ha ka 17 tarik mynta u Risaw ki la leit ban ïakynduh markhmat ïa ka DMHO WKHD ban ujor halor katei ka jingbym don doktor bad ka jingbym biang ki lad ai jingsumar kaba la buh jingeh ïa ki paidbah khamtam haba don ki jingjia ne jingshitom, kiba donkam kyrkieh ïa ka jingïarap.
Ki nongkitkam ka KSU Hynnengbrei ki la ong ba nalor ka jingbym don u doktor, ka la lap ruh ba katei ka PHC ka dang duna ha kiba bun ki liang khamtam ha kaba ïadei bad ki jingduna ki kamra thiah ïa ki nongpang, ka jingbym biang ki dawai dashin bad kiwei kiwei kaba la nang pyndkoh shuh shuh ïa ka rukom treikam jong katei ka PHC.
Namar kata, na ka liang ka KSU ka dawa na ka tnat ka koit ka khiah jong ka Sorkar Jylla bad kumjuh na u MLA ka Mawshynrut Constituency Bah Methodios Dkhar ban phai khmat lem sha katei ka PHC kaba la ju ai jingshakri ïa kiba bun phew tylli ki shnong ka Shallang C&RD Block hapoh Mawshynrut.
