Shillong, Risaw 17
Ka sorkar jylla lyngba ka tnat Personnel ka la buh kyndon halor ka jingai kam ai jam biang ïa ki babu sorkar kiba la dep shongthait.
Katkum ka hukum ba la pynmih ha kine ki khyndiat sngi ba la dep, la ong ba kan dei ka kynhun Myntri lane ka Cabinet kaba hap ban ai jingmynjur ïa baroh ki jingtyrwa ban thung kam biang ïa ki babu sorkar ba la shongthait ha kaba ka jingsiew ka long kumjuh bad ka tulop ba ki la ïoh hashwa ban shongthait lait noh ka bai bam tymmen lane ka jingsiew kaba ïasyriem bad ka tulop ba ki la shim hashwa ban shongthait lait noh ka bai bam tymmen.
Na ka bynta kiwei pat ki jingai kam ai jam ïa ki babu sorkar ha ka dur jong ka ‘Contract’ ha kaba ka jingsiew ka duna ban ïa ka tulop ba ki la shim hashwa ban shongthait lait noh ka bai bam tymmen ym donkam satia ban hap ïoh shwa ïa ka jingmynjur jong ka kynhun Myntri. Hynrei ïa kiba kum kine ki jingthung kam yn donkam ban ïoh jingmynjur shwa na u Myntri ba dei peit ïa ka tnat hashwa ban pan jingmynjur na ka tnat Personnel & A.R. (A) bad Finance (E) kumba ju long ka rukom.
