Shillong, Risaw 17
Kum shibynta ban khring paidbah bad kyntiew ïa ki kam jngohkai pyrthei hapoh ka thaiñ Mawkynrew bad kumjuh ruh ban kyntiew ïa ki nongrep sohphlang jong ka thaiñ kum ha ki shnong Mawleiñ, Pyngwait bad kiwei kiwei pat, ka Seng Samla Katholik Mawkynrew Parish kan sa pynlong da ka tamasa ïa kaba la tip kum ka Sohphlang Festival kaba shisngi ka ban long ha ka 21 tarik mynta u Risaw ha Holy Cross School Mawkynrew.
Katei ka tamasa kan sdang naduh ka por 10 baje mynstep haduh 6 baje janmiet. Ha katei ka tamasa kan don ruh ka jingpyninam ïa ki bam tynrai kiba bun jait, ki jait jingshna kiba la ohshrong da ki kti bad kumjuh ruh ki jait jingthaiñ kiba ki paidbah ki la shna bad thaiñ.
Haba kren sha ki lad pathai khubor ha ka Sngi Ba-ar ha Shillong Press Club, u nongaibuit jong ka Seng Samla Parish, u Bah Carmel Lyngdoh u la ong ba lehse katei ka tamasa bam sohphlang kan dei ha ka sien kaba nyngkong eh ha ka jylla jong ngi ba kan don kum kane ka tamasa bam sohphlang.
U Bah Lyngdoh u la ong ba haduh mynta ïa u sohphlang la ju thung bad rep da ki nongrep ha ki thaiñ Mawkynrew, Mawleiñ, Pyngwait bad kumta ter ter.
Shuh shuh u Bah Lyngdoh u la ïathuh ba u sohphlang uba ki briew ki thung hapoh Mawkynrew u dei u sohphlang u bym ai dawai bad uba ai jingmyntoi shibun eh ïa ka koit ka khiah jong ki briew.
Na ka liang u Bah Pynbianglang Kshiar uba dei u President jong ka Seng Samla Parish, u la pynpaw ba ka la sngewdei ka bynta ban shim ïa ki sienjam ban kyntiew ïa u sohphlang uba dei u jingbam tynrai uba mih na ka dong bad ka thaiñ Mawkynrew.
“Ka jingpynlong jong ngi ïa kane ka tamasa kan sa kyntiew shuh shuh ha kaba ïadei bad ka ïew jong une u sohphlang bad lehse ngi lah ban khring ïa ka jingmut jong ka sorkar ha kaba ïadei ban kyntiew ne ban wad ki lad ki lynti kumno ban dang kyntiew shuh shuh ïa une u sohphlang kumjuh ruh ïa ki nongrep sohphlang”, la ong u Bah Kshiar.
Ïa ka bai-lut bai-sep na ka bynta ban pynlong ïa katei ka tamasa yn bei tyngka hi da ka tnad kam jngohkai pyrthei ka jylla ha ryngkat ka jingïatreilang bad ka Meghalayan Age bad ka Arts & Culture.
Shuh shuh ha katei ka sngi ban pynlong ïa katei ka tamasa kan sa don ruh ka jingai khusnam ïa uwei napdeng ki rangbah napoh Laitkyrhong uba la ïohpdiang ïa ka Padmashree Award.
