Shillong, Risaw 17
Ka Jylla ka la dep ban pynphai ïa ka bording ilektrik sha kito kiba la ai bording ïa ka Jylla da kaba shim kylliang ïa ka bording ban pynduna ïa ka jingpynlip bording ha kito ki bnai ba rang tyrkhong.
Wat lada ka Jylla ka la dep pynphai ïa ka bording, hynrei ka dang donkam pat ïa ka Meghalaya Energy Cor-poration Ltd (MeECL) ban peit thuh ïa ka jinglong jingman ka bording khnang ba kan nym ktah than ïa ki kynta pynlip bording ilektrik ha ki bnai ban sa wan khamtam ha ki bnai ba rang tyrkhong ka mariang ha u snem ban wan.
La ïathuh ba ka por ban pynphai noh ïa ka bording ilektrik ka kut sha kito kiba ka Jylla ka la shim kylliang ïa ka bording ha ki bnai ba duna um ha ki jaka pynmih bording khamtam hapdeng u ‘nai Ïaïong ter ter haduh u Jylliew mynta u snem.
“Ka jingpynlip bording ka la kham neh slem namarba hap ban pynbiang lang ïa ka jingdonkam ban pynphai ïa ka bording sha kito kiba la ai bording ïa ka Jylla ha kito ki bnai,” la ong ka tyllong khubor.
Kum ban pynkynmaw, ka MeECL kam shym la lah ban weng shisyndon ïa ka jingpynlip bording ha kine ki khyndiat bnai ba la leit wat lada ka jingdon ka um kum ha pung Umïam ka la kham biang, namarba ïa ka bording kaba pynmih la hap ban pynphai shwa sha kito kiba la ai bording ïa ka Jylla ha kito ki bnai ba duna ka jingpynmih bording namar ka jingduna ka um.
Kumba ka long mynta, ïa ka jingpynlip bording la weng shwa bad ki don ki sngi ba ka jingpynlip ka dang don katto katne kynta khnang ban pynsoi ïa ka bording ha ki bnai ban sa wan.
