Gaza, Risaw 17 (UNI)
Palat 3,000 ngut ki briew ki la shah pynïap bad 11,000 ngut kiba la mynsaw na ka jingther bom jong ka Israel ïa ka Gaza Strip, bad ki don ruh sa palat 1 million ngut kiba la phet noh na ki ïing ki sem ha ka thaiñ Shatei jong ka Gaza, la ong u Ambassador ka Palestine sha Russia, u Abdel Hafiz Nofal, ha ka Sngi Ba-Ar.
“Ki don bun kiba la ïap bad mynsaw ha Gaza kumba ka long mynta. Katkum ki jingkheiñ jingdiah ba la ïoh haduh mynta, palat 3,000 ngut ki la ïap, 11,000 ngut ki la mynsaw bad da ki hajar tylli ki ïing ki la shah pynjulor ha Gaza Strip. Ki don ruh sa palat 1 million ngut ki briew kiba la phet noh na ki ïing ki sem jong ki ha ka thaiñ Shatei jong ka Gaza Strip,” la ïathuh u Ambassador ha ka lad pathai khubor Solovyov Live.
Ha ka 7 tarik Risaw, ki lehnoh Hamas na Palestine ki la thombor ïa ka Israel na Gaza Strip ha kaba ki la pynïap beiñ ïa ki spah ngut ki nong Israel bad ki la rahbor ruh ïa kiba bun ngut. Kane ka jingthombor ka Hamas ka la pynlong ïa ka Israel ba kan thombor kylla da ki ‘nam ding ïa ka Gaza Strip.
Ka Israel ka la khang ruh ban ai umbam, bording, bam bad umphniang sha Gaza Strip. Na ka liang ka Israel ka la pyntip ba palat 1,300 ngut ki nongshong shnong ki la shah pynïap ha ki lehnoh Hamas.
Ki shipai Israel ki la dep ruh ban kyntu ïa ki paidbah ka Gaza ba kin mih noh na ka thaiñ Shatei bad ban leit sha ki bynta ba Shathie jong ka Gaza. Hynrei kiba bun tylli ki kynhun na kylleng ka pyrthei ki la pynrem ïa kane ka jingleh jong ka Israel namar ka lah ban nang pynjynjar bun shah ïa ki paidbah ka Gaza.
