New Delhi, Risaw 17 (UNI)
Ha ka rai ba la pynmih ha ka Sngi Ba-Ar ka Supreme Court ka la kyntait ban ai jingithuh da ka aiñ ïa ka jingshongkha para kynthei lane para shynrang (Same-Sex Marriages) da kaba kynthoh ba dei tang ka Parliament bad ki Ïingdorbar Thawaiñ ki jylla kiba lah ban thaw ïa ki aiñ ki ban ai jingithuh.
Ki nongbishar ka Supreme Court ki la mynjur ba ka long shabar jong ka ïingbishar ban ai jingbthah ïa ka Ïingdorbar Thawaiñ na ka bynta ban ai jingithuh da ka aiñ ïa ka jingshongkha para kynthei lane para shynrang.
Ki nongbishar kiba la shong bishar halor ki mukotduma kiba ïadei bad katei ka mat ki long u Chief Justice ka Ri India, u Justice Dhananjaya Y Chandrachud lem bad saw ngut kiwei pat ki nongbishar, kata, u Justice Sanjay Kishan Kaul, S Ravindra Bhat, ka Hima Kohli bad u PS Narasimha.
Nalorkata, kitei san ngut ki nongbishar ki la mynjur ban ai jingbit ïa ka High-Powered Committee ba yn thung da ka Sorkar Pdeng ka ban peit ïa ki mat ki jura kiba ïadei bad kito kiba ïashongkha para kynthei ne para shynrang, bad ban ai jingmut ban shim ïa ki lad ki lynti ban pynbeit ïa ki jingduna bad jingbakla.
Uwei na ki nongbishar, kata, u Justice Sanjay Kishan Kaul, u la mynjur bad u Chief Justice ba ka sorkar ka dei ban pynthikna ba kiba shongkha para kynthei ne para shynrang ki dei ban ïoh ïa ki jingïarap bakongsan. U la ong ruh ba ka jingai ïa ka hok ban ïashongkha para kynthei ne para shynrang kam lah ban long na ka liang ka ïingbishar namar kane ka dei ka kam jong ka Ïingdorbar Thawaiñ.
Hynrei u la ong ruh ba kine kiba shongkha para kynthei ne para shynrang ki dei ban ïoh ïa ki hok jong ki khnang ba kin lah ban ïa im lang ha ka imlang-sahlang.
U Justice S Ravindra Bhat, u la ong ba ka jingshongkha para kynthei ne para shynrang kam dei kaba tang ha ki jaka sor ne kaba jia tang hapdeng ki briew ba riewspah.
Ïa ka rai jong ka Supreme Court la thoh la ka jong ka jong da u Chief Justice bad Justice Kaul, Bhat bad Narasimha. Ki nongbishar ki la kyntait ruh ban pynwandur thymmai ïa ki kyndon jong ka Special Marriage Act (SMA) ban ai jingithuh ïa kiba shongkha para kynthei ne para shynrang. Watla katta ruh, ki la ong ba kito kiba shongkha para kynthei ne para shynrang ki don ka hok ban ïashong bad ïasah lang khlem ka jingbyrngem byrsit ne jingshah thombor bad jingtuklar jong kiwei.
